Sənaye və energetika

SOCAR Rumıniyadakı yanacaqdoldurma məntəqələrinin sayını 33-ə çatdırıb

16 mart 2016 13:49 (UTC +04:00)

Bakı. Aqşin Rafiqoğlu - APA-Economics. SOCAR Rumıniyada investisiya layihələrini uğurla davam etdirərək, yanacaqdoldurma şəbəkəsini ilbəil genişləndirir.

Dövlət Şirkətindən “APA-Economics”ə verilən məlumata görə, bu gün Buxarestdə SOCAR brendi ilə növbəti yanacaqdoldurma məntəqəsi istifadəyə verilib. Bununla da Rumıniyada SOCAR brendi altında fəaliyyət göstərən YDM-lərin sayı 33-ə çatıb.

Açılış mərasimində Rumıniya Parlamentinin deputatları, Azərbaycan və Türkiyənin Rumıniyadakı səfirləri, Rumıniyada fəaliyyət göstərən bir çox aparıcı şirkətlərin rəhbərləri, Türk İş Adamları Dərnəyinin nümayəndələri, ''SOCAR Petroleum SA'' şirkətinin əməkdaşları, Rumıniyada yaşayan və təhsil alan azərbaycanlılar, habelə yerli KİV nümayəndələri iştirak ediblər.

“SOCAR Petroleum SA” şirkətinin baş direktoru Həmzə Kərimov bildirib ki, Buxarest-Konstanta magistral yolu üzərində yerləşən yeni stansiyada təklif olunan yüksək keyfiyyətli məhsul və xidmətlərdən müştərilərin razı qalacağına əmindirlər. “Dizel Avro 5”, “Super Dizel Avro 5”, “Benzin 95” və "Benzin 98" tipli yanacaq məhsulları satışının həyata keçiriləcəyi məntəqədə 3 sayğac quraşdırılıb.

Burada 4 kiçik avtonəqliyyat vasitəsi və 2 iri tutumlu yük maşınının eyni zamanda yanacaqla təmin edilməsi mümkündür. Məntəqədə elektromobillərin enerji ilə təminatı, həmçinin “Roviniete” (yol vergisi) də daxil olmaqla bir sıra ödənişlərin edilməsi üçün xüsusi avadanlıqlar quraşdırılıb, eləcə də 24 saat ATM xidməti fəaliyyət göstərir.

Qeyd edək ki, SOCAR Rumıniyanın artıq 16 regionunda - Botoşan, Suçeava, Nyamts, İaşi, Bihor, Buzau, Bakau, Vrancea, Timiş, İlfov, Kluj, Valcea, Arad, Bistritsa-Nasaud, Sibiu və Buxarestdə yanacaqdoldurma məntəqələrinə malikdir.

İlkin Əhmədov