Bakı. Viktoriya Dementyeva – APA. Minsk şəhərində (Belarus) MDB-nin İcraiyyə Komitəsində Xarici İşlər nazirlikləri arasında ATƏT-lə bağlı məsləhətləşmələr keçirilib.
APA-nın Komitənin Humanitar əməkdaşlıq, ümumi siyasi və sosial problemlər Departamentinə istinadən verdiyi məlumata əsasən, məsləhətləşmələr zamanı iştirakçılar MDB ölkələrinin ATƏT çərçivəsində əməkdaşlığı, «Helsinki+40» prosesi, həmçinin ATƏT-in Xarici işlər nazirləri Şurasının dekabrın 5-6-da Kiyevdə keçiriləcək XX toplantısına hazırlıq məsələlərini müzakirə ediblər. Görüş iştirakçıları MDB-nin İcraiyyə Komitəsi və Antiterror Mərkəzinin ATƏT-in Katibliyi ilə əməkdaşlığının inkişaf etdirilməsinin lehinə çıxış ediblər.
Qeyd edək ki, iclasda Rusiya, Ukrayna, Belarus, Ermənistan, Qazaxıstan, Qırğızıstan və Tacikistan nümayəndələri iştirak ediblər. Azərbaycan isə məsləhətləşmələrə müşahidəçi qismində qatılıb.