Sosial

Ana səhifə

Sosial

9 illik təhsil bazasından texnikumlara qəbul imtahanı avqustun 21-də keçiriləcək

15 avqust 2008 09:40 (UTC +04:00)

Bakı. İlhamə İsabalayeva - APA. Tələbə Qəbulu üzrə Dövlət Komissiyası (TQDK) avqustun 21-də 2008-2009-cu tədris ili üçün 9 illik (əsas) təhsil bazasından orta ixtisas məktəblərinə qəbul imtahanı keçirəcək. APA-nın məlumatına görə, bu barədə TQDK sədri Məleykə Abbaszadə bu gün keçirdiyi mətbuat konfransında bildirib. M. Abbaszadənin sözlərinə görə, abituriyentlər imtahana buraxılış vərəqəsi və “Abituriyentin vəsiqəsi” sənədlərini təqdim etdikləri Sənəd Qəbulu Komissiyasından avqustun 18, 19 və 20-də əldə edə bilərlər.

TQDK sədri deyib ki, bu il 9 illik təhsil bazasından orta ixtisas məktəblərinə ayrılan 9452 plan yerinə 23277 abituriyent sənəd verib. Onlardan 14147-si qız, 9130-u oğlandır. Qəbul imtahanı Bakı, Sumqayıt, Naxçıvan, Gəncə, Lənkəran, Mingəçevir, Şəki, Şirvan, Quba və Göyçay şəhərlərində 41 binada keçiriləcək.

Bakıda 10162, Sumqayıtda 1935, Naxçıvanda 659, Gəncədə 2868, Lənkəranda 1364, Mingəçevirdə 1344, Şəkidə 958, Şirvanda 1577, Qubada 904, Göyçayda 1506 abituriyent imtahan verəcək. M. Abbaszadə qeyd edib ki, bu il əsas təhsil bazasından 89 ixtisas üzrə 47 orta ixtisas məktəbinə qəbul aparılır.

9452 plan yerindən 5831-i ödənişsiz, 3621-i ödənişli (ötən il 5392 yer ödənişsiz, 2769 ödənişli) əsaslarla olan ixtisaslardır. Onlardan 8566 yer Azərbaycan bölməsinə (5248 ödənişsiz, 3318 ödənişli), 256 yer rus bölməsinə (156 ödənişsiz, 100 ödənişli), 630 yer birgə müsabiqə aparılan ixtisaslara (427 ödənişsiz, 203 ödənişli) aiddir. Abituriyentlər 1 saat 30 dəqiqə ərzində hər fəndən 15 sual olmaqla, Ana dili, Azərbaycan tarixi və riyaziyyatdan imtahan verəcəklər. Rus bölməsinin abituriyentləri ana dili fənn bloku daxilində rus dili fənni ilə yanaşı, Azərbaycan dil fənnindən də imtahan verəcəklər. Həmin abituriyentlərə Azərbaycan dilindən 5, rus dilindən isə 10 sual təqdim olunacaq.
İmtahanın nəticələri avqustun 25-dək TQDK-nın internet saytında yerləşdiriləcək və “Abituriyent” jurnalının xüsusi buraxılışında dərc olunacaq.

texnikum_qəbul