Sosial

Ana səhifə

Sosial

Azərbaycan paytaxtı Öküz ilini qarşılamağa hazırlaşır – FOTOSESSİYA

Azərbaycan paytaxtı Öküz ilini qarşılamağa hazırlaşır – <font color=red>FOTOSESSİYA </font>

29 dekabr 2008 10:36 (UTC +04:00)

Bakı. Ülkər Qasımova - APA. Bakı Yeni ili qarşılamağa hazırlaşır. Hər il olduğu kimi, bu il də şəhərin mərkəzi küçələrində şam ağaclarının (“yolka”) bəzədilməsinə bayramdan hələ 15 gün əvvəl başlanıb. Paytaxtın bir neçə yerində böyük “yolka”lar quraşdırılıb. Paytaxtın baş yolkası isə elə paytaxtın baş meydanında qurulub. Yeni il bayramının atributları sayılan Şaxta baba və Qar qız bəzədilmiş “yolka”ların yanında dayanaraq şəkil çəkdirmək istəyən uşaq və böyüklərin yolunu gözləyir. Bakının ən prestijli nöqtəsi olan Fəvvarələr Meydanında 15-ə yaxın “yolka” bəzədilib. “Yolka”, Şaxta baba və Qar qızla şəkil çəkdirmək 2-3 manata başa gəlir. Şaxta babalar şəhər əhalisinin şəkil çəkdirməyə çox da maraq göstərməməsindən şikayətçidirlər: “Ötən illərə nisbətən bu il bizimlə şəkil çəkdirənlərin sayı azalıb. Ancaq biz yenə də iş başındayıq. Gözləyirik”. Şaxta babalar Yeni il gecəsi üçün sifariş qəbul etdiklərini də bildiriblər. Sifarişlərin qiyməti məsafədən asılı olaraq dəyişir. Uşaqların sevimlisi olan bəyaz saqqallı babalar şəhərin mərkəzindəki ünvanlara 50 manata getməyə razılaşsalar da, daha uzaq məsafələr üçün 100-200 manat arasında pul istəyirlər. Şaxta babaların xidmətinin müddəti 1 saatdır. Bu məbləğin çox olduğunu düşünənlər üçün daha sərfəli variant da var. Şaxta babanın geyim dəsti ayrı-ayrılıqda satışa çıxarılıb. Bunun üçün lazım olan palto 30 manat, saqqal 8-10 manat, papaq 3-4 manata satılır. Oyuncaq Şaxta babaların qiyməti isə ölçüsündən asılı olaraq 5 manatla 50 manat arasında dəyişir. Evdə Yeni il atmosferi yaratmaq istəyənlər daha böyük Şaxta baba fiquru arzulayırlarsa, azı 100 manatlarından keçməlidirlər. Hətta şəhərdə 500 manata və daha baha qiymətə satılan Şaxta baba fiqurlarına da rast gəlmək olar.

“Yolka”ların da qiyməti ölçüsündən asılı olaraq dəyişir. Belə ki, ölçüsü balaca olan “yolka”lar şəhərin mərkəzində 10 manata, böyüklər isə 300-400 manata və daha baha qiymətə satışa çıxarılıb. Ötən ilə nisbətən qiymətlərin bir az artdığını etiraf edən satıcılar endirim etdiklərini də söyləyiblər: “Bu il alver zəif gedir. Yəqin şəhərin mərkəzində baha qiymətə satıldığını eşidib kənardan almağa üstünlük verirlər, yaxud da bu il şəhər əhalisi bayrama ürəklə hazırlaşmır”.

Mağazalarda satışa çıxarılması yasaqlanmış pirotexniki vasitələrə rast gəlmək mümkün deyil. Satıcıların dediyinə görə, həmin partlayıcı vasitələri satdıqları üçün bir neçə satıcı bu il məsuliyyətə cəlb olunub: “Bu vasitələri gizli şəkildə satan üç satıcını polislər apardı. Bunu görəndən sonra kim riskə gedər?”

Fəvvarələr meydanında hər addımbaşı müxtəlif oyuncaqlar satılır. Bayram ərəfəsində uşaqların diqqətini daha çox çəkən şarların qiyməti də qaldırılıb. Bayramdan əvvəl 10 ədədi 20 qəpiyə satılan şarların biri indi 10 qəpikdir.

Övladlarını Yeni il bayramı münasibətilə təşkil olunan bayram şənliklərinə aparmaq istəyən valideynlərin nəzərinə çatdıraq ki, artıq paytaxtda fəaliyyət göstərən bütün teatrlarda “yolka şənlikləri”nə start verilib. Azərbaycan Dövlət Musiqili Komediya Teatrında biletlərin qiyməti 6 manat, Səməd Vurğun adına Rus Dram Teatrında 3 manat, Rəşid Behbudov adına Dövlət Mahnı Teatrında 4 manat, Dövlət Uşaq Teatrında isə 3 manatdır. Teatrlarda bayram tədbirləri yanvarın 6-na qədər davam edəcək. Dekabrın 26-dan Bakı Dövlət Sirkində start götürən “Qış illüziyası” adlı proqramın biletlərinin qiyməti isə 10 manatdır.

Aparılan müşahidələrdən belə qənaətə gəlmək olur ki, Bakı əvvəlki illərdən fərqli olaraq bu dəfə Yeni ili – Öküz ilini o qədər də təmtəraqla qarşılamır.

Sonda qeyd edək ki, Məhərrəmlik ayının başlaması ilə əlaqədar hər il ənənəvi olaraq dekabrın 31-də paytaxtda keçirilən atəşfəşanlıq da ləğv olunub.

yeni_il_bayram