Sosial

Ana səhifə

Sosial

Ötən il şimal rayonlarında ətraf mühitin mühafizə tələblərinin pozulması ilə bağlı 162 hal aşkarlanıb

09 yanvar 2009 15:04 (UTC +04:00)

Bakı. İlhamə İsabalayeva-APA. Ekologiya və Təbii Sərvətlər Nazirliyinin 5 saylı şöbəsi nəzarət etdiyi inzibati ərazilərdə - Quba, Qusar, Xaçmaz, Dəvəçi, Siyəzəndə ətraf mühitin mühafizəsi sahəsində keçirdiyi yoxlamalar nəticəsində ötən il ərzində 109 akt və 53 protokol tərtib edib. Nazirliyin mətbuat xidmətindən APA-ya verilən məlumata görə, atmosfer havasının mühafizəsi sahəsində 23 akt tərtib edilib, 11 məcburi göstəriş verilib. Müəssisə və təşkilatlara 7505,5 manat məbləğində məcburi ödəmə hesablanıb və ondan 7475,5 manat ödənilib.

Su mühafizəsi sahəsində 16 akt tərtib edilib, 10 məcburi göstəriş verilib, müəssisə və təşkilatlara isə 9005,4 manat məbləğində məcburi ödəmə hesablanıb və ödənilib. Ətraf mühitə qanunsuz məişət və istehsalat tullantılarının yerləşdirilməsinə görə 18 akt və 15 protokol tərtib edilib. 15 təşkilat 26495 manat məbləğində cərimələnib, 4 nəfər tərəfindən isə keçən ildən qalan 308 manat ödənilib.

Floranın mühafizəsi sahəsində 30 akt və 21 protokol tərtib edilib. Qanunu pozan 21 nəfər 13290 manat məbləğində cərimələnib, 28 nəfərə qarşı 6250,8 manat məbləğində iddia qaldırılıb. 25 nəfər tərəfindən 2039,5 manat məbləğində iddia, 21 nəfər tərəfindən isə keçən ilin qalıqları ilə birlikdə 1836,9 manat cərimə ödənilib. 14 iş tədbir görülməsi üçün məhkəmə orqanlarına göndərilib. Faunanın mühafizəsi sahəsində 9 protokol tərtib edilib, 9 nəfər 9933 manat məbləğində cərimələnib, 8 iş isə tədbir görülməsi üçün məhkəmə orqanlarına göndərilib.