Sosial

Ana səhifə

Sosial

Azərbaycan Yazıçılar Birliyində şəhid şairlərin xatirəsi anılıb

19 yanvar 2009 12:30 (UTC +04:00)

Bakı. Kəmalə Quliyeva – APA. Azərbaycan Yazıçılar Birliyində (AYB) 20 Yanvar faciəsinin 19-cu ildönümü münasibətilə şəhid şairlərin xatirəsi anılıb. APA-nın məlumatına görə, tədbirdə çıxış edən AYB-nin birinci katibi Fikrət Qoca bildirib ki, 20 Yanvar faciəsi və Qarabağ müharibəsində Azərbaycanın 4 şairi - Ülvi Bünyadzadə, Nizami Aydın, Fuad Qəriboğlu və Alı Mustafayev şəhid olublar. Azərbaycanın şair və yazıçılarından Xəlil Rza Ulutürkün, Sabir Əhmədovun, Qaçay Köçərlinin övladlarının Qarabağ müharibəsində şahid olduqlarını xatırladan F. Qoca deyib ki, millət olaraq azadlıq uğrunda ölməyə qadir olduğumuzu Azərbaycanın şairləri və onların övladları da sübut ediblər.

Şəhid Ülvi Bünyadzadənin bibisi, filologiya elmləri namizədi Almaz Ülvi isə 20 Yanvar gecəsində doğulan uşaqların indi 19 yaşına – Ülvi Bünyadzadənin şəhid olduğu yaşa qədəm qoyduqlarını vurğulayıb: “Ülvi 1989-cu ildə əsgərlikdən qayıtdıqdan sonra bir and yazmışdı. Bu andına sonadək sadiq qaldı və vətən uğrunda şəhid oldu”.

Tədbirin sonunda məktəb şagirdlərinin ifasında şəhid şairlərin şeirləri səsləndirilib.