Sosial

Ana səhifə

Sosial

Azərbaycanda pensiyaların 93%-i plastik kartlarla ödənilir

26 yanvar 2009 07:55 (UTC +04:00)

Bakı. Nicat Mustafayev – APA-Economics. Azərbaycanda 1,03 mln. nəfərin pensiyasının ödənişi plastik kartlarla həyata keçirilir. Bu barədə «APA-Economics»ə Dövlət Sosial Müdafiə Fondunun (DSMF) ictimaiyyətlə əlaqələr sektorunun müdiri Elman Babayev məlumat verib.
E.Babayevin sözlərinə görə, artıq şəhərlərdə yaşayan pensiyaçıların 100%-i üzrə pensiyalar plastik kartlarla ödənilir. Ötən il xüsusilə kəndlərdə pensiyaların plastik kartlarla ödənişinin təmin olunması istiqamətində işlər davam etdirilib və son məlumata əsasən, artıq kəndlərdə 84% üzrə pensiyalar plastik kartlarla ödənilir.
Bundan başqa, ötən ilin oktyabr ayının statistikasına əsasən, Azərbaycanda ümumilikdə ödənişdə olan pensiyaların 87%-i, yəni 960 min nəfərin pensiyasının ödənişi plastik kartlarla aparılırdısa, hazırda ödənişdə olan pensiyaların 93%-i, yəni 1,03 mln. nəfərin pensiyasının ödənişi plastik kartlarla həyata keçirilir. Bu məqsədlə ümumilikdə 417, o cümlədən kənd və qəsəbələrdə 51 əlavə bankomat qurulub.
Qeyd edək ki, Azərbaycanda sığorta-pensiya sisteminin inkişafına dair Dövlət Proqramına (2009-2015-ci illər) əsasən, növbəti illər ərzində pensiyaların plastik kartlarla bankomatlar vasitəsilə ödənilməsi sisteminin təkmilləşdirilməsi davam etdiriləcək, bankomat və POS-terminallarla təchizat gücləndiriləcək, ödənişlərdə çoxfunksiyalı çip-kartlardan istifadə təmin olunacaq, ucqar kəndlərdə ödənişin mütərəqqi üsullarla aparılması üzrə müxtəlif ölkələrin təcrübəsi öyrənilərək tətbiq ediləcək.