Sosial

Ana səhifə

Sosial

“İtkin düşmüş şəxslərin ailə üzvlərinin qarşılaşdığı sosial problemlər” mövzusunda tədbir keçirilib

24 may 2011 12:16 (UTC +04:00)

Bakı. Ramil Məmmədli-APA. “Ehtiyatda və İstefada olan Zabitlər” İctimai Birliyi “İtkin düşmüş şəxslərin ailələrinin hüquqlarının müdafiəsinə dəstək” layihəsi çərçivəsində “İtkin düşmüş şəxslərin ailə üzvlərinin qarşılaşdığı sosial problemlər” mövzusunda tədbir keçirib.

APA-nın məlumatına görə, ictimai birliyin sədri Yaşar Cəfərli bildirib ki, Ermənistanın Azərbaycana qarşı apardığı müharibə zamanı itkin düşən azərbaycanlıların ailə üzvləri qarşılaşdıqları problemlərlə əlaqədar öncə yerli icra strukturlarına müraciət etməli, sonra isə məsələyə dair narazılıqlarını dövlət başçısına məktub vasitəsilə çatdırmalıdırlar. Y Cəfərli bu cür ailələrin qarşılaşdığı problemləri də sadalayıb: “Tibbi müayinə və müalicə, məcburi tibbi sığorta, layiqli yaşayış sahəsi və bağ sahəsi ilə təmin olunma, o cümlədən itkin düşmüş ailə üzvünə görə sığortanın ödənilməsi və digər cari problemlər öz həllini tapmalıdır. Ən vacib problem isə itkinlərin axtarışı məsələsində nəticənin olmamasıdır”.

Y. Cəfərlinin sözlərinə görə, tədbirdə iştirakla bağlı Nazirlər Kabinetinə, Dövlət Sığorta Şirkətinə, Ombudsman Aparatına, Müdafiə Nazirliyinə, Baş prokuror yanında Korrupsiyaya qarşı Mübarizə İdarəsinə rəsmi dəvət məktubu göndərilsə də, toplantıda iştiraklarını məqsədəuyğun hesab etməyiblər. “İtkin Düşmüş Şəxslərin Ailələrinə Sosial Dəstək” İctimai Birliyin sədri Bətulə Cabbarova deyib ki, itkin düşmüş şəxslərin ailə üzvlərinin aktiv dəstəyi sayəsində bu problemlərin həllinə nail olmaq olar. Əks təqdirdə hökumət orqanları məsələyə laqeyd yanaşmaqda davam edəcəklər. Onun sözlərinə görə, təmsil etdiyi quruma layihə müddətində 62 itkin ailəsindən müraciət daxil olub, onun 29-nun sənədləri Dövlət Sığorta Şirkətinə təqdim olunması üçün hazırlanıb.

Sonra tədbirdə layihənin hüquqşünası Telman Əbilov, ailə üzvü itkin düşmüş Nərminə Zeynalova, Xırdaxanım Azayeva və digərləri qarşılaşdıqları problemlər haqqında danışıblar.