Sosial

Ana səhifə

Sosial

Bakıda əmək müfəttişləri üçün təlim-seminar keçirilir

25 may 2011 10:06 (UTC +04:00)

Bakı. Sevil Valehova - APA-Economics. Bu gün Azərbaycan Əmək və Əhalinin Sosial Müdafiə Nazirliyində (ƏƏSMN) Əmək Müfəttişliklərinin Regional Alyansına (ƏMRA) üzv ölkələrin əmək müfəttişləri üçün təlim-seminar işə başlayıb.

“APA-Economics”in məlumatına görə, tədbirin açılış mərasimində çıxış edən ƏƏSMN-in Dövlət Əmək Müfəttişliyinin rəisi əvəzini icra edən Rauf Tağıyev bildirib ki, 11-dən çox ölkənin əmək müfəttişlərinin iştirak etdiyi seminarda təhlükəsizlik tədbirlərinin inkişafında ƏMRA-nın rolu, iş yerlərində bədbəxt hadisələr və peşə xəstəliklərinin qarşısının alınması, əməyin mühafizəsi ilə bağlı ictimai məlumatlılıq səviyyəsinin artırılması, risk dərəcələrinin təhlili, sosial tərəfdaşlarla əlaqələrin möhkəmləndirilməsi və s. məsələlər müzakirə ediləcək.

R.Tağıyevin sözlərinə görə, tədbirdə Almaniya, Bolqarıstan, Bosniya və Herseqovina, Litva, Niderland, Qırğızıstan, Türkiyə və digər ölkələrin əmək müfəttişliklərinin nümayəndələri iştirak edirlər.

Almaniyanın Əməyin Mühafizəsi və Sağlamlığı Drezden Akademiyasının eksperti Volker Didier istehsalatda baş verən bədbəxt hadisələrin və peşə xəstəliklərinin qarşısının alınmasına dair başlıca prinsiplərdən danışıb.

İş yerində əməyin mühafizəsi və əməyin təftiş olunması sistemləri üzrə fransalı məsləhətçi Volfqanq Rixtofen isə Əmək Müfəttişliyinin fəaliyyətinin əsas prinsipləri haqqında məruzə edib.