Sosial

Ana səhifə

Sosial

Gəncədə regionların inkişafı ilə bağlı elmi-praktiki konfrans keçirilib

27 may 2011 13:58 (UTC +04:00)

Bakı. Vahab Rzayev - APA-Economics. Bu gün Gəncə şəhərində İqtisadi İnkişaf Nazirliyinin (İİN) təşkilatçılığı ilə “Azərbaycan regionlarının davamlı sosial-iqtisadi inkişafı: nailiyyətlər və perspektivlər” mövzusunda elmi-praktiki konfrans keçirilib.

Nazirlikdən “APA-Economics”ə verilən məlumatına görə, konfransda müvafiq dövlət qurumlarının, Gəncə-Qazax regionu üzrə yerli icra hakimiyyəti orqanlarının nümayəndələri, elmi-tədris müəssisələrinin məsul şəxsləri və iqtisadiyyatın müxtəlif sahələrində fəaliyyət göstərən sahibkarlar iştirak ediblər.

Konfransda çıxış edən iqtisadi inkişaf nazirinin müavini Niyazi Səfərov regionların sosial-iqtisadi inkişafının Azərbaycan iqtisadiyyatı üçün prioritet olduğunu bildirərək qeyd edib ki, ölkə regionlarının sosial-iqtisadi inkişafı, yoxsulluğun azaldılması, ərzaq təhlükəsizliyinin təmin edilməsi və digər dövlət proqramlarının uğurlu icrası nəticəsində qeyri-neft sektoru daha da inkişaf edib, ölkə iqtisadiyyatına investisiya qoyuluşu artıb, sahibkarlıq fəaliyyəti genişlənib, regionlarda yeni iş yerləri və müəssisələr yaradılıb. Kənd təsərrüfatında məhsul istehsalının stimullaşdırılması, əhalinin ərzaq məhsullarına olan tələbatının yerli istehsal hesabına ödənilməsi və ərzaq təhlükəsizliyinin təmin edilməsi istiqamətində dövlət tərəfindən həyata keçirilən tədbirlər də regionların iqtisadi mənzərəsinin dəyişməsində əhəmiyyətli rol oynayır. Ötən il 73 mindən çox yeni iş yeri açılıb ki, bunun da 53 mini daimidir. Ümumilikdə isə son 7 ildə ölkədə 1 mln.-a yaxın iş yeri açılıb ki, bu da məşğulluğun təmin edilməsində əsas amil kimi çıxış edir.

Gəncə Şəhər İcra Hakimiyyətinin başçısı Elmar Vəliyev çıxışında son illər regionların sürətlə inkişaf etdiyini, dövlət başçısının regionların inkişafına göstərdiyi xüsusi diqqət və qayğı nəticəsində rayonlarda yeni istehsal, emal və infrastruktur sahələrinin yaradıldığını, sahibkarlıq fəaliyyətinin genişləndiyini, məşğulluğun səviyyəsinin artdığını bildirib.

Ekologiya və təbii sərvətlər nazirinin müavini Firdovsi Əliyev, İİN-in Regionların inkişafı və dövlət proqramları şöbəsinin müdiri Sahib Məmmədov, Xarici Ticarət siyasəti və Ümumdünya Ticarət Təşkilatı şöbəsinin müdiri Bəxtiyar Alışov və İqtisadi siyasət, təhlil və proqnozlaşdırma şöbəsinin müdir müavini Cəmaləddin Quliyev ölkə rəhbərliyi tərəfindən aparılan məqsədyönlü və düşünülmüş iqtisadi siyasət nəticəsində regionların investisiya potensialının artdığını, sahibkarlığın inkişafına kompleks dövlət dəstəyi tədbirlərinin genişləndiyini, dövlət proqramlarının uğurla icra olunduğunu, regionlarda infrastruktur, sosial-mədəni, istehsal və emal obyektlərinin yaradıldığını, regionların inkişafında sahibkarlığın rolunun artdığını vurğulayıblar.

Azərbaycan Milli Elmlər Akademiyasının birinci vitse-prezidenti Arif Həşimov, İİN-in İqtisadi İslahatlar Elmi-Tədqiqat İnstitutunun direktoru Vilayət Vəliyev, Azərbaycan Dövlət Aqrar Universitetinin rektoru Mirdamət Sadıqov, AMEA-nın Gəncə bölməsinin müdiri Fuad Əliyev, Dövlət İdarəçilik Akademiyasının “Geostrateji Araşdırmalar Mərkəzi”nin müdiri Əli Nuriyev ölkənin təbii və əmək potensialından səmərəli istifadə etməklə qeyri-neft sektorunun sürətli inkişafının təmin edilməsi üçün elmi araşdırmaların zəruriliyini qeyd edib, bu sahədə həyata keçirilən tədqiqat işləri barədə məlumat veriblər.