Sosial

Ana səhifə

Sosial

Korrupsiyaya Qarşı Mübarizə üzrə QHT-lərin Məlumat və Əməkdaşlıq Şəbəkəsi yeni “Qazdan İstifadə qaydaları”na münasibətini açıqlayıb

27 may 2011 16:49 (UTC +04:00)

Bakı - APA-Economics. Korrupsiyaya Qarşı Mübarizə üzrə QHT-lərin Məlumat və Əməkdaşlıq Şəbəkəsi yeni “Qazdan İstifadə qaydaları”na münasibətini açıqlayıb.

Şəbəkənin mətbuat xidmətindən “APA-Economics”ə verilən məlumata görə, Azərbaycan prezidentinin 22 aprel 2011-ci il tarixli fərmanı ilə Nazirlər Kabinetinə elektrik enerjisindən istifadə qaydalarının yeni layihəsini hazırlanması və Azərbaycan prezidenti ilə razılaşdırmaqla müəyyən etməsi tapşırılıb. Nazirlər Kabinetinin 12 may 2011-ci il tarixli 80 saylı qərarı ilə yeni “Qazdan İstifadə qaydaları” təsdiqlənib.

Qeyd edək ki, Korrupsiyaya Qarşı Mübarizə üzrə QHT-lərin Məlumat və Əməkdaşlıq Şəbəkəsi Açıq-Cəmiyyət İnstitutu - Yardım Fondu tərəfindən maliyyələşdirilən “Kommunal sektorda istehlakçı hüquqlarının qorunmasına yardım göstərilməsi” layihəsi çərçivəsində dəfələrlə əhalinin elektrik enerjisi, təbii qaz, su ilə təchizatı sahəsində mövcud problemlərə diqqət çəkərək onların həlli yollarını da təklif edib.

Layihə çərçivəsində «Qaz təchizatı müəssisəsi ilə məişət abonenti (əhali) arasında təbii qazın alqı-satqısına dair birtipli Müqavilə», «İçməli su təchizatı və çirkab suların axıdılması müəssisəsi ilə məişət abonenti (əhali) arasında xidmətlərin göstərilməsinə dair birtipli Müqavilə», «Enerji təchizatı müəssisəsi ilə məişət abonenti (əhali) arasında elektrik enerjisinin alqı-satqısına dair birtipli Müqavilə» layihələri hazırlanıb. Bu yeni müqavilələrin layihələri ictimaiyyətə təqdim olunmaqla yanaşı, 2 fevral 2011-ci il tarixdə müvafiq təchizatçı qurumlara (“Azərenerji” ASC, “Azəriqaz” İstehsalat Birliyi, “Azərsu” ASC, “Bakıelektrikşəbəkə” ASC) və İqtisadi İnkişaf Nazirliyinə göndərilib.

Şəbəkə tərəfindən layihə çərçivəsində təklif olunmuş əlavə və dəyişikliklərin 85,7%-i yeni “Qazdan istifadə Qaydaları”nda əksini tapıb, 68,6%-i müqavilə şərtlərinə daxil edilib. Şəbəkə bu faktı öz uğuru kimi qiymətləndirir.

Şəbəkə elektrik enerjisindən istifadə qaydalarının yeni layihəsinin və texniki şərtlərin verilməsi qaydalarının hazırlanması zamanı “Kommunal sektorda istehlakçı hüquqlarının qorunmasına yardım göstərilməsi” layihəsi ilə əməkdaşlıq ediləcəyinə, əhalinin qazla və içməli su ilə təchizatı ilə təminatı sahəsində də bu cür addımların atılacağına ümidvar olduğunu bildirir.

“Azərsu” ASC-dən isə Şəbəkəyə rəsmi şəkildə bildiriblər ki, qurumun mütəxəssisləri tərəfindən “Sudan istifadə qaydaları”nın layihəsi yenidən işlənilib və razılaşdırma üçün aidiyyəti qurumlara təqdim edilib. Şəbəkənin ekspertləri tərəfindən hazırlanmış «İçməli su təchizatı və çirkab suların axıdılması müəssisəsi ilə məişət abonenti (əhali) arasında xidmətlərin göstərilməsinə dair birtipli Müqavilə» şərtlərinin əksəriyyəti “Azərsu” ASC-nin dövlət qurumlarına təqdim etdiyi layihədə öz əksini tapıb.