Sosial

Ana səhifə

Sosial

BDU-da “Azərbaycanda elmə “Tomson Reuters” Agentliyi tərəfindən baxış” mövzusunda tədbir keçirilib

01 iyun 2011 09:56 (UTC +04:00)

Bakı. Kəmalə Quliyeva – APA. Bakı Dövlət Universitetində (BDU) “Azərbaycanda elmə “Tomson Reuters” Agentliyi tərəfindən baxış” mövzusunda tədbir keçirilib. APA-nın məlumatına görə, tədbirdə “Tomson Reuters” Agentliyinin Mərkəzi və Şərqi Avropa üzrə ölkə menecerləri David Horki, Şahruz Şərifrazi (Shahrooz Sharifrazy) və Mətin Tunc qonaq kimi iştirak ediblər.

BDU-nun rektoru Abel Məhərrəmov bildirib ki, “Tomson Reuters” nümayəndələrinin səfərində məqsədə Azərbaycanın elmi ictimaiyyəti ilə yaxından tanış olmaqdır: “BDU alimlərinin tədqiqatları dünyanın bir çox nüfuzlu elmi jurnallarında, o cümlədən “Tomson Reuters”in siyahısında olan jurnallarda uğurla çap olunur. Agentliyin nümayəndələri ali təhsil ocaqlarının reytinqləri müəyyənləşdirilərkən hansı göstəricilərə daha çox üstünlük vermək lazım olduğu ilə bağlı elmi ictimaiyyətin suallarını cavablandıracaqlar”.

Rektor deyib ki, “Tomson Reuters”in məlumat bazasında 23 min akademik və elmi jurnal, 23 milyon patent, 110 konfrans haqqında məlumat, 9 min veb-səhifə cəmləşib. Məlumat bazasında 40 milyondan çox bilgi-məlumat nöqtəsi var. Bu il “Tomson Reuters”in indeksli jurnallarında Azərbaycana dair 450-dən çox məqalə dərc olunub. Onun 160-ı BDU-nun payına düşür.

A. Məhərrəmov xatırladıb ki, “Reuters” Agentliyi 1851-ci ildə Londonda, “Tomson” Agentliyi isə 1934-cü ildə Kanadada yaradılıb. Bu iki şirkət 2008-ci ildə birləşərək “Tomson Reuters” İnformasiya Agentliyi adlandırılıb.