Sosial

Ana səhifə

Sosial

İstanbulda Türk Dünyası Araşdırmalar Vəqfinin təşkilatçılığı ilə Türk Dünyası Uşaq Şənliyi keçirilib - FOTOSESSİYA

İstanbulda Türk Dünyası Araşdırmalar Vəqfinin təşkilatçılığı ilə Türk Dünyası Uşaq Şənliyi keçirilib - <font color=red>FOTOSESSİYA</font>

01 iyun 2011 15:52 (UTC +04:00)

İstanbul. Mayis Əlizadə-APA. İstanbulun İnönü stadionunda Türk Dünyası Uşaq Şənliyi keçirilib. APA-nın Türkiyə bürosunun məlumatına görə, şənlikdə Azərbaycan, Qazaxıstan, Qırğızıstan, Kosovo, Macarıstan, Bolqarıstan, Tatarıstan, İran, Rumıniya, Şimali Kipr Türk Cümhuriyyətindən və Türkiyənin müxtəlif məktəblərindən gələn şagirdlər milli rəqslər ifa ediblər. Şənlikdə Azərbaycanı Türk Dünyası Araşdırmaları Vəqfinin Bakı Atatürk liseyinin şagirdləri təmsil ediblər. İnönü stadionunda keçirilən şənlikdə APA-ya açıqlama verən Azərbaycan qrupunun rəhbəri, Bakı Atatürk liseyin müəllimi Tamilla Məmmədova 17 ildən bəri liseyin bu tədbirlərdə iştirak etdiyini, əsas məqsədlərinin Türk toplumları arasındakı mədəni əlaqələrin inkişaf etdirilməsindən ibarət olduğunu deyib. Tamilla Məmmədova əlaqələrin inkişaf etdirilməsi sahəsində əsas işin xalqların öhdəsinə düşdüyünü vurğulayıb. İranın Təbriz şəhərindən gələn heyətin rəhbəri Məmmədbağır İbrahimpur şagirdlərin İstanbuldakı tədbirə gəlməsi üçün valideynlərin maddi dəstək verdiyini deyib: “Öz mədəniyyətimizi qorumaq və inkişaf etdirmək üçün könüllü şəkildə əlimizdən gələn hər işi görürük. Mədəniyyət işləri məşğul olmaq üçün yaratdığımız Şuranın başlıca məqsədi Türkiyə və digər Türk ölkələri ilə mədəni əlaqələri yüksək səviyyəyə çatdırmaqdır”. Təbriz heyətinin rəhbəri, bu səpkili tədbirləri təşkil edən Türkiyəyə və Türk Dünyası Araşdırmaları Vəqfinə minnətdarlığını bildirib.
İnönü stadionunda uşaq şənliyi bitdikdən sonra APA-ya açıqlama verən Türk Dünyası Araşdırmaları Vəqfinin sədri, professor Turan Yazgan dünyanın müxtəlif ölkələrindən türk uşaqlarını 17 ildən bəri bir araya gətirməkdən böyük xoşbəxtlik hiss etdiyini deyib: “Bu tədbirlərdən çox önəmli nəticələr gözləyirəm. Bu nəticə - 10-15 ildən sonra bu uşaqların o ölkələrdə Türkiyənin ən qiymətli səfirləri olmalarıdır. Bu uşaqlar biznes dünyasında özlərinə yer tutanda, ölkələrinin əcnəbi ölkələrlə ticarət əməkdaşlığından söhbət gedərkən, o əməkdaşlığı Türkiyə ilə həyata keçirəcəklər. O uşaqlara buradakı dostlarını heç vaxt unutmamağı tövsiyə edirəm. Unutmaları mümkün də deyil. Onların hamısı buradan ağlayaraq ayrılırlar. Bu uşaqların Türk dünyası üçün çox iş görə biləcəklərinə inanıram. Bu, bir iqtisadi məsələdir. Bu iqtisadi məsələ içində görüləcək olan iş İsmayıl bəy Qaspıralının 100 il əvvəl dediyi “Dildə, fikirdə, işdə əməkdaşlıq” ideyasını reallaşdırmaqdır. Bu yoldakı çalışmalarımızı əbədi davam etdirəcəyik. 20-25 il içində hər millət öz reallıqları ilə qarşı-qarşıya qalacaq və ondan sonra müstəmləkəçiliyə yer olmayacaq. Heç bir ölkə başqa ölkəni müstəmləkəyə çevirməyə cəsarət edə bilməyəcək. Biz bu işi insanlıq adına edirik, öz millətimiz adına isə gördüyümüz bu işlərdən qürur duyuruq. Bu işləri bu uşaqlar həyata keçirəcəklər”.
APA-nın “Türk dünyasının önəmli nöqtələrində məktəbləriniz var. Hər yerdə xalq sizin məktəblərinizin daha da genişlənməsini istəyir. Bununla bağlı hansı planlarınız var?”sualını Turan Yazqan belə cavablandırıb: “Doğrusu, bu məsələ ilə bağlı gördüyümüz işlərdə vəziyyət bizi qane etmir. Ona görə də, hələlik işləri daha da böyütməyi düşünmürük. Ancaq bizim öz ideal və niyyətlərimizdən vaz keçməyəcəyimizi bütün dünya bilməlidir. Hansı vəziyyətdə olsaq da, həmişə irəliyə gedəcəyik və oralarda uşaqlarımızı əvvəlki statuslarında oxutmağa davam edəcəyik”.
İnönü stadionundakı uşaq şənliyindən sonra Türkiyənin pop müğənniləri konsert proqramı ilə çıxış ediblər.