Sosial

Ana səhifə

Sosial

Ümumdünya Səhiyyə Təşkilatı Almaniyada yayılmış mədə-bağırsaq epidemiyasını nəzarətə götürüb

07 iyun 2011 12:19 (UTC +04:00)

Bakı. Sevil Zeynalqızı-APA. Almaniya hökumətinin müraciətinə əsasən Ümumdünya Səhiyyə Təşkilatı (ÜST) Almaniyada yayılmış mədə-bağırsaq epidemiyasını nəzarətə götürüb. Bu haqda APA-ya ÜST-nın Azərbaycandakı nümayəndəliyinin yoluxucu xəstəliklər üzrə mütəxəssisi Cavahir Süleymanova məlumat verib.

Onun sözlərinə görə, bu zaman Hemolitik Uraemik Sindrom (HUS) və ya entero-hemorrhagic E. coli (EHEC) epidemiyasının miqyası, ciddiliyi, eləcə də yetkinlik yaşına çatmış insanlar arasında HUS-a yoluxma hallarının yüksək olması nəzərə alınıb. ÜST Almaniya səhiyyə rəsmilərinin araşdırma aparmalarına kömək məqsədilə digər ölkələrdə qeydə alınan yoluxma halları barədə əldə olunan məlumatların çatdırılması üçün həm Avropa İttifaqına daxil olan, həm də Avropa İttifaqından kənarda olan üzv dövlətlərlə, eləcə də beynəlxalq tərəfdaşlarla yaxından əməkdaşlıq edir.

“Yoluxmanın mənbəyi hələ müəyyənləşdirilməyib, lakin indiyə qədər əldə olan dəlillər onu göstərir ki, xəstəliyin yayılması Almaniyanın şimal ərazisi ilə məhdudlaşır. Yoluxma mayın əvvəlindən bəri kəskin şəkildə artıb və hələ də yeni yoluxma halları qeydə alınmaqda davam edir. Bu, EHEC -in nadir serotip qrupu nəticəsində baş vermiş, olduqca iri miqyaslı və kəskin epidemiyadır. Bu, indiyə qədər Avropada baş vermiş ən böyük HUS epidemiyasıdır. Hazırda baş verən epidemiya qeyri-adi xüsusiyyətlərə malikdir. Belə ki, normal hallarda yüksək risk qrupuna azyaşlı uşaqlar və yaşlı insanlar aid olduğu halda, bu epidemiyanın təsirinə yetkinlik yaşına çatmış insanlar (88 %-i 20 yaş və ya 20 yaşdan yuxarı) və əsasən də qadınlar (EHEC ilə yoluxma hallarının 60 faizi, HUS ilə yoluxma hallarının isə 71 faizi) məruz qalırlar. Məktəb yaşlı uşaqlar arasında da yoluxma faktları qeydə alınıb”.

C. Süleymanova qeyd edib ki, Robert Koch İnstitutu, regional və yerli səhiyyə orqanları epidemiyanın səbəblərini araşdırmaqda davam edir. ÜST vəziyyətin monitorinqinin aparılması üçün Almaniya hökumətinə, eləcə də lazımi laboratoriya imkanları olmayan ölkələrə öz yardımını təklif edib: “Robert Koch İnstitutu və Hamburq səhiyyə qurumunun hadisə-nəzarət metodu üzrə apardıqları araşdırma göstərib ki, infeksiyanın əsas daşıyıcısının təzə meyvə-tərəvəz məhsullarının olması ehtimalı daha böyükdür. Kahı, çiy pomidor və xiyar diqqət mərkəzində saxlanılır, bununla yanaşı, əlavə araşdırmalar da davam etdirilir. Digər meyvə-tərəvəz məhsullarının infeksiyanın daşıyıcısı olmaması nəticəsinə gəlmək hələlik mümkün deyil”.

C. Süleymanova bildirib ki, ÜST Almaniyaya və yoluxma hallarının qeydə alındığı digər ölkələrə səfər etməyin qadağan edilməsini məsləhət görmür. ÜST ölkələrə aid mümkün qadağalar və epidemiya ilə əlaqədar iqtisadi məsələlər barədə heç bir qərar qəbul etməyib. Mütəxəssisin sözlərinə görə, Azərbaycanda hazırda bu sahədə heç bir təhlükə yoxdur: “Amma əhaliyə meyvə-tərəvəzləri yeyərkən adi gigiyena qaydalarına riayət etmək məsləhət gorülür”.