Sosial

Ana səhifə

Sosial

Azərbaycan və Sverdlovsk vilayətinin həmkarlar təşkilatları əməkdaşlığı genişləndirir - FOTO

Azərbaycan və Sverdlovsk vilayətinin həmkarlar təşkilatları əməkdaşlığı genişləndirir - <font color=red>FOTO</font>

10 iyun 2011 10:42 (UTC +04:00)

Bakı. Nicat Mustafayev – APA. Bakıda səfərdə olan Rusiyanın Sverdlovsk vilayəti Həmkarlar İttifaqları Federasiyasının sədri Andrey Vetlujskixin başçılıq etdiyi nümayəndə heyəti Azərbaycan Həmkarlar İttifaqları Konfederasiyasının (AHİK) rəhbərliyi ilə görüşüb.

APA-nın məlumatına görə, görüşdə Azərbaycan və Rusiya arasında dostluq və səmərəli əməkdaşlığın dinamik inkişafı qeyd olunub, iki ölkənin həmkarlar ittifaqları arasında qarşılıqlı səfərlərin, keçirilmiş rəsmi görüşlərin, aparılmış faydalı danışıqların və təcrübə mübadiləsinin hüquqi sahədə əlaqələrin genişləndirilməsinə əhəmiyyətli təkan verdiyi vurğulanıb.

Görüş zamanı A.Vetlujskix qeyd edib ki, Sverdlovsk vilayətində 4,5 mln. nəfər insan yaşayır, bunun 1,350 mln. nəfəri Yekaterinburq şəhərinin sakinləridir: «Sverdlovsk vilayətinin azərbaycanlı diasporu özündə 50 min nəfəri birləşdirir, bunlardan 25-30 mini Yekaterinburq şəhərində yaşayır və işləyir. Bu insanların əmək və sosial-iqtisadi hüquqlarının qorunması üçün Azərbaycan və Sverdlovsk vilayətinin həmkarlar ittifaqları əməkdaşlıq etmək niyyətindədir».

A.Vetlujskix rəhbərlik etdiyi təşkilatın fəaliyyəti haqqında məlumat verib və bildirib ki, hazırda Sverdlovsk vilayəti Həmkarlar İttifaqları Federasiyasının 1 mln. üzvü var və üzvlük haqqı 1% təşkil edir. A.Vetlujskix həmçinin AHİK-in nümayəndələrini iyul ayında Yekaterinburqda keçiriləcək «Həmkarlar İttifaqlarının İnnovasiyası» forumuna dəvət edib.

Öz növbəsində AHİK-in sədrinin müavini Aqil Dadaşov Konfederasiyanın yaranma tarixindən, onun fəaliyyətindən ətraflı məlumat verib və bildirib ki, hazırda AHİK bir çox ölkələrlə sıx əməkdaşlıq edir.

Qeyd edək ki, hazırda AHİK-in 1,6 mln. üzvü var, üzvlük haqqı isə 2% təşkil edir.

Xatırladaq ki, 2011-ci ilin mart ayında Yekaterinburqda AHİK və Sverdlovsk vilayəti Həmkarlar İttifaqları Federasiyası arasında əmək miqrantlarının (Azərbaycan vətəndaşlarının) hüquqlarının müdafiəsi ilə bağlı protokol imzalanıb. Protokola əsasən, Sverdlovsk vilayəti Həmkarlar İttifaqları Federasiyası əmək miqrantlarının sosial və iqtisadi hüquqlarının qorunmasında yaxından iştirak edəcək, əmək miqrantlarının həmkarlar ittifaqlarında birləşməsinə səy göstərəcək, əsasən Sverdlovsk vilayətinə işləməyə gələn Azərbaycan vətəndaşlarını hüquq və öhdəlikləri haqqında məlumatlandıracaq, onların əməyinin leqallaşdırılmasına maksimum köməklik göstərəcək.

Qeyd edək ki, 2011-ci ilin mart ayında AHİK-in sədri Səttar Mehbalıyevin başçılıq etdiyi nümayəndə heyəti Yekaterinburqda olub. İndiki görüş Sverdlovsk vilayəti Həmkarlar İttifaqları Federasiyasının nümayəndə heyətinin Azərbaycana cavab səfəridir.