Sosial

Ana səhifə

Sosial

Azərbaycanda muzdla çalışan işçilərin orta siyahı sayı 1,354 mln. nəfərə çatıb

13 iyun 2011 09:04 (UTC +04:00)

Bakı. Nicat Mustafayev – APA-Economics. Bu ilin may ayında Azərbaycanda müəssisə və təşkilatlarda muzdla çalışan işçilərin orta siyahı sayı 1 354,2 min nəfər olub və onların 856,6 min nəfəri iqtisadiyyatın dövlət bölməsində, 497,6 min nəfəri isə qeyri-dövlət bölməsində fəaliyyət göstərib.

Dövlət Statistika Komitəsindən «APA-Economics»ə verilən məlumata görə, muzdla işləyənlərin 25,6%-i təhsildə, 19,8%-i ticarət, nəqliyyat vasitələrinin təmiri sahəsində, 12,1%-i sənayedə, 10,1%-i əhaliyə səhiyyə və sosial xidmətlərin göstərilməsində, 5,5%-i tikintidə, 4,7%-i nəqliyyat və anbar təsərrüfatında, 4,1%-i istirahət, əyləncə və incəsənət sahəsində, 3,2%-i peşə, elmi və texniki fəaliyyəti sahəsində və 14,9%-i iqtisadiyyatın digər sahələrində məşğul olub. Muzdlu əsaslarla çalışan işçilərin 20,4%-i məhsul istehsalı sahələrində cəmlənib.

Cari ilin yanvar-may aylarında ölkə iqtisadiyyatında muzdla çalışan işçilərin orta aylıq əmək haqqı əvvəlki ilin müvafiq dövrünə nisbətən 11,4% artaraq 349,6 manat təşkil edib. Digər fəaliyyət növləri ilə müqayisədə mədənçıxarma sənayesində, maliyyə və sığorta fəaliyyətində, informasiya və rabitədə, peşə, elmi və texniki fəaliyyət sahəsində, inzibati və yardımçı xidmətlərin göstərilməsi sahəsində, tikintidə orta aylıq əmək haqqı daha yüksək olub.