Sosial

Ana səhifə

Sosial

Bakıda əlillik problemləri ilə bağlı zona müşavirəsi keçirib

13 iyun 2011 11:39 (UTC +04:00)

Bakı. Sevil Zeynalqızı - APA-Economics. Əmək və Əhalinin Sosial Müdafiəsi Nazirliyi (ƏƏSMN) tərəfindən Bakının Yasamal rayonunda “Əlilliyə səbəb olan faktorların öyrənilməsi, əlillik vəziyyəti ilə əhalinin əsas xəstəlik sinifləri üzrə xəstələnməsi hallarının kompleks şəkildə öyrənilməsi və əlilliyin qarşısının alınmasında reabilitasiya tədbirlərinin rolunun artırılması” mövzusunda zona müşavirəsi keçirilib.

Nazirliyin İctimaiyyətlə əlaqələr şöbəsindən “APA-Economics”ə verilən məlumata görə, müşavirədə ƏƏSMN-in və Səhiyyə Nazirliyinin, tibbi-sosial ekspert komissiyalarının, Dövlət Sosial Müdafiə Fondunun yerli şöbələrinin, Əhalinin Sosial Müdafiə mərkəzlərinin, bərpa-müalicə müəssisələrinin və QHT-lərin nümayəndələri iştirak ediblər.

Müşavirədə paytaxt rayonlarında əlilliyi doğuran faktorların öyrənilməsi, əlilliyin müəyyən edilməsi və ilkin əlilliyin profilaktikası, müayinə olunan şəxslərin reabilitasiya imkanlarının dürüst qiymətləndirilməsi istiqamətlərində aparılan kompleks tədbirlərin genişləndirilməsi məqsədilə müvafiq dövlət qurumları və ictimai təşkilatlar arasında informasiya mübadiləsinin həyata keçirilməsi məsələsi müzakirə edilib. Tədbirdə həmçinin bərpa-müalicə müəssisələri ilə tibbi-sosial ekspert komissiyalarının birgə fəaliyyətinin səmərəli təşkili, eyni zamanda bu sahədə şəffaflığın artırılmasının təmin edilməsi və sair məsələlər müzakirə olunub.

Müşavirə əlil insanların sosial həyata inteqrasiyası, onların cəmiyyətin digər vətəndaşları ilə bərabər imkanlar qazanması, sağlam həyat tərzinin təbliği və əlillik problemləri ilə bağlı effektiv maarifləndirmə tədbiri kimi nəzərdə tutulub.