Sosial

Ana səhifə

Sosial

Mədət Quliyev: “Ona yaxın cəzaçəkmə müəssisəsinin rəhbəri təqaüdə göndərilib”

14 iyun 2011 11:16 (UTC +04:00)

Bakı. Şəhriyar Əlizadə - APA. Ədliyyə Nazirliyi tərəfindən 7 cəzaçəkmə müəssisəsi tikilir. Yaxın vaxtlarda qadınlar üçün tikilən cəzaçəkmə müəssisəsi istifadə veriləcək. APA-nın məlumatına görə, bu barədə Penitensiar Xidmətin rəisi Mədət Quliyev bildirib.

Onun sözlərinə görə, Azərbaycan hökuməti tərəfindən cəzaçəkmə müəssisələri lazımi vəsaitlə təmin olunur: “Biz də çalışırıq ki, həmin vəsait lazım olan yerə xərclənsin”.

M. Quliyev ilkin olaraq Şəki, Gəncə və Bakıda tikilən cəzaçəkmə müəssisələrinin təhvil veriləcəyini deyib: “Qobustan həbsxanası tələblərə cavab vermir. Həm də Qobustan qoruğu ərazisində yerləşdiyinə görə tezliklə başqa yerə köçürüləcək”.

M. Quliyev bildirib ki, bəzi cəzaçəkmə müəssisələrinin rəhbərləri xidməti vəzifələrini yerinə yetirə bilmədikləri üçün təqaüdə göndərilib: “10-a yaxın cəzaçəkmə müəssisəsinin rəhbəri təqaüdə göndərilib. Bu, yaş həddi il deyil, xidməti vəzifələrini düzgün yerinə yetirə bilmədikləri ilə bağlıdır. Bəziləri Penitensiar Xidmətin adına ləkə gətirən hərəkətlərə yol verdikləri üçün vəzifələrindən azad olunublar. Qobustan həbsxanasında da rüşvətxorluqla bağlı prokurorluq tərəfindən araşdırma aparılır və düzgün qərar veriləcək”.