Sosial

Ana səhifə

Sosial

Azərbaycanda əmək qanunvericiliyinə əməl olunmasına dövlət nəzarəti təkmilləşdirilir

01 iyun 2012 09:26 (UTC +04:00)

Bakı - APA-Economics. Son illər Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin fəaliyyətinin təkmilləşdirilməsi, onun maddi-texniki bazasının və kadr potensialının gücləndirilməsi, əmək qanunvericiliyinə əməl olunmasına dövlət nəzarətinin operativliyinin təmin edilməsi, əmək müfəttişlərinin peşəkarlıq səviyyəsinin artırılması istiqamətində məqsədyönlü tədbirlər həyata keçirilir.

Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən “APA-Economics”ə verilən məlumata görə, bu sahədə Almaniya, Türkiyə, Polşa, Bolqarıstan, Hollandiya, Rusiya və digər dövlətlərin iş təcrübəsi öyrənilərək səmərəli nəzarət üsulları tətbiq edilir.

Cari ilin may ayında Beynəlxalq Maliyyə Korporasiyası ilə Dövlət Əmək Müfəttişliyi Xidməti arasında 2012-ci il üçün Fəaliyyət Planı imzalanıb. Əmək qanunvericiliyinin icrasına dövlət nəzarəti üzrə aparılan yoxlamaların effektivliyinin artırılması məqsədinə xidmət edən Fəaliyyət Planı əmək qanunvericiliyinə əməl olunmasına nəzarət məqsədilə aparılan yoxlamaların planlaşdırılması üçün Riskə Əsaslanan Metodologiyanın işlənib hazırlanması, yoxlamaların Daxili Elektron-Məlumat və İdarəetmə Sisteminin yaradılması, yoxlamaların prosedur qaydalarını, müfəttişlərin hüquq və vəzifələrini və digər məsələləri əks etdirən daxili Təlimatın hazırlanmasını nəzərdə tutur.

Eyni zamanda Fəaliyyət Planına əmək qanunvericiliyinin icrasına nəzarət məqsədilə aparılan yoxlamalarda standart forma kimi istifadə edilən Sorğu vərəqəsinin işlənib hazırlanması, Dövlət Əmək Müfəttişliyi Xidmətinin müvafiq əməkdaşları üçün yeni prosedur və qaydalar, habelə beynəlxalq təcrübə barədə təlim proqramlarının, sahibkarlar üçün əmək norma və qaydaları haqqında müvafiq maarifləndirmə tədbirlərinin həyata keçirilməsi kimi məsələlər daxildir.

Beynəlxalq Maliyyə Korporasiyası ilə səmərəli əməkdaşlıq çərçivəsində Dövlət Əmək Müfəttişliyi Xidmətinin işinin gücləndirilməsi istiqamətində ötən müddətdə xeyli işlər görülüb. Beynəlxalq Maliyyə Korporasiyasının maliyyə dəstəyi ilə İordaniya Krallığının Əmək Müfəttişliyi ilə təcrübə mübadiləsi məqsədilə DƏMX-in nümayəndə heyətinin bu ölkəyə səfəri təşkil edilib.

Eyni zamanda Dövlət Əmək Müfəttişliyi Xidməti tərəfindən nəzarət işi həyata keçirilərkən işəgötürənlərə köməklik məqsədilə «Əmək qanunvericiliyi: norma və qaydalar» adlı metodik vəsait hazırlanıb. Metodik vəsaitin məqsədi müəssisələrdə dövlət nəzarəti zamanı əmək qanunvericiliyindən irəli gələn hansı norma və qaydaların yoxlanılacağı barədə işəgötürənlərin əvvəlcədən məlumatlandırılmasıdır. Vəsait 28 Aprel - Ümumdünya Əməyin Mühafizəsi Gününə həsr edilmiş «Yaşıl» iqtisadiyyatda təhlükəsiz və sağlam əməyin təşviqi» mövzusunda keçirilən konfransa dəvət olunmuş işəgötürənlərə paylanıb.