Sosial

Ana səhifə

Sosial

Naxçıvanda bələdiyyələrin fəaliyyətində şəffaflığın təmin olunması mövzusunda seminar-müşavirə keçirilib

01 oktyabr 2012 12:23 (UTC +04:00)

Bakı. Elnur Hüseynquluyev – APA-Economics. Naxçıvanda Azərbaycan Auditorlar Palatası (AAP) və Ədliyyə Nazirliyinin Bələdiyyələrlə İş Mərkəzinin birgə təşkilatçılığı ilə «Naxçıvan Muxtar Respublikası bələdiyyələrinin fəaliyyətində şəffaflığın təmin olunması» mövzusunda seminar-müşavirə keçirilib.

Palatadan «APA-Economics»ə verilən məlumata görə, tədbirin keçirilməsində əsas məqsəd «Açıq Hökumətin təşviqinə dair 2012-2015-ci illər üçün Milli Fəaliyyət Planı» və «Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı»nda qarşıya qoyulmuş maliyyə nəzarətinin təkmilləşdirilməsi və bələdiyyələrin maliyyə hesabatlarının vaxtında təsdiq olunmasına nəzarət mexanizmlərinin və proseduralarının düzgün qurulması, həmçinin müəssisə və təşkilatlarda maliyyə intizamının möhkəmləndirilməsində müstəqil auditin rolunun artırılması olub.

Tədbirdə AAP-ın sədri Vahid Novruzov seminarın təşkilində əsas məqsədin bələdiyyələrin fəaliyyətində şəffaflığın təmin olunması sahəsində peşəkar müzakirələr aparmaq, bu sahədə mövcud problemləri təhlil etmək, həmin problemlərin həlli üzrə əməli təkliflər irəli sürmək və maarifləndirmə mexanizmlərini müəyyən etməkdən ibarət olduğunu bildirib. Maliyyə nəzarəti və şəffaflıq sahəsində Azərbaycanda möhkəm hüquqi bazanın yaradıldığını vurğulayan sədr bu sahədə hələ də bir sıra problemlərin, yerli özünüidarəetmə orqanlarında audit işinin tətbiqi sahəsində həllini gözləyən məsələlərin olduğunu diqqətə çatdırıb.

Qeyd olunub ki, audit təkcə yoxlama, nəzarət orqanı deyil, eləcə də, bələdiyyələrə vergi uçotunun aparılması, biznes-planın tərtib edilməsi, bələdiyyə əmlakının qiymətləndirilməsi məsələlərində kömək edən qurumdur.

Seminar-müşavirədə digər iştirakçılar tərəfindən «Naxçıvan Muxtar Respublikasının sosial-iqtisadi inkişafında bələdiyyələrin rolu», «Bələdiyyələrdə əlaqədar auditor xidmətindən istifadə istiqamətləri», «Bələdiyyə vergiləri və uçot sistemi» və «Bələdiyyələrdə auditin aparılmasının əsasları» mövzularında məruzələri dinlənilmiş və məruzələr ətrafında geniş müzakirələr aparılıb.