Sosial

Ana səhifə

Sosial

Azərbaycan Təhsil Nazirliyi: Siniflərdə ideal şagird sıxlığı 20 nəfərdir

02 oktyabr 2012 14:08 (UTC +04:00)

Bakı. Kəmalə Quliyeva - APA. “Bakının orta məktəblərində həddindən artıq sıxlıqdır, əksər siniflərdə şagirdlərin sayı 40-45 nəfərə çatır. 800-1000 nəfərlik məktəblərdə 2000-2400 uşaq oxuyur. Hətta paytaxtda bir neçə dörd növbəli məktəb var”. Bunu APA-ya Bakı Şəhəri üzrə Təhsil İdarəsinin (BŞTİ) İctimaiyyətlə əlaqələr sektorunun müdiri Zəminə Əliqızı deyib.

Onun sözlərinə görə, orta məktəblərdə sıxlıq Bakının mərkəzindən çox, Bakı ətrafında daha artıq özünü göstərir: “Bakıda 326 məktəb BŞTİ-nin tabeliyindədir. Onlardan yalnız 50 faizində bir növbəli sistemdir. Qalan 50 faizi isə iki və daha çox növbəlidir. Bu o deməkdir ki, həmin məktəblərdə sinifləri yerləşdirmək üçün yer yoxdur. Bu il I sinfə gedən şagirdlərin sayında da rekord artım müşahidə olundu, bu say 36 min nəfəri keçib. Ona görə də bu il paytaxtın I siniflərində də çox ciddi sıxlıq var”.

Z. Əliqızı bildirib ki, adətən nüfuzlu və keyfiyyətli dərs verən məktəblərə güclü axın olur: “Valideynin övladını istədiyi təhsil müəssisəsində oxutdurmaq hüququ var. Bəzən valideynə hansısa müəllimin sinfində artıq 40 uşaq olduğunu izah eləmək olmur. Hamı uşağının o müəllimin sinfində oxumasını istəyir. Bu səbəbdən nüfuzlu məktəblərimizdə hər sinifdə 40-45 uşaq oturur. Müəllim peşəkardırsa, bu, təhsilin keyfiyyətinə təsir etmir. Çünki indi kurrikulum, interaktiv təlim metodları tətbiq edilir”.

Sektor müdirinin sözlərinə görə, problemin qarşısını almaq üçün məktəb tikintisini sürətləndirmək lazımdır: “Xüsusilə Bakı ətrafı ərazilərdə yeni məktəblərə daha çox ehtiyac var. Son illər Bakı ətrafı qəsəbələrə regionlardan çox güclü axın olub. Əvvəllər yeni qəsəbələr salınanda, infrastruktur da salınırdı. İndi isə qəsəbələr salınsa da, həmin ərazilərdə yeni məktəblər tikilmir. Buna görə də Bakı ətrafında məktəblərə daha ciddi tələbat yaranıb. Bakının mərkəzində isə yer olmadığından məktəblər üçün əlavə korpuslar tikmək problemi yaranıb. Bu təhsil ili öncəsi Bakıda 7 məktəb binası istifadəyə verilib. Amma bu, tələbatı tam ödəmir. Bakıda tələbatı tam ödəmək üçün ən azı 150 məktəb tikilməlidir”.

Təhsil Nazirliyinin Kənd rayonları üzrə ümumtəhsil şöbəsinin müdiri Aydın Əhmədov isə APA-ya deyib ki, mövcud qanunvericiliyə əsasən, sinif 20 nəfərdən ibarət olduqda komplektləşdirilir. Amma ucqar rayon yerlərində uşağın sayı az olsa da, sinif komplektləşdirilə bilər. Siniflərdə maksimum şagird sayının nə qədər olmasına gəlincə, A. Əhmədov deyib ki, bu, sinif otağının normativindən asılıdır: “Əgər sinifdə 32 uşaq varsa, onu iki hissəyə bölmək olmaz. Elə siniflər var ki, onun sahəsi normativə cavab vermir, yəni bir sinfə o qədər uşaq yerləşdirmək olmaz. Bu zaman sanitar-epidemioloji stansiyanın rəyi nəzərə alınır. Adətən siniflərdə sıxlıq əlacsızlıqdan yaranır. Amma bu, kütləvi hal almayıb. Siniflərdə ideal şagird sıxlığı 20 nəfərdir”.