Sosial

Ana səhifə

Sosial

Bakıda 5 oktyabr - Beynəlxalq Müəllimlər Günü ilə bağlı tədbir keçirilib

04 oktyabr 2012 15:42 (UTC +04:00)

Bakı. Sevil Zeynalqızı - APA. Bu gün Bakıda 5 oktyabr - Beynəlxalq Müəllimlər Günü ilə bağlı tədbir keçirilib.

APA-nın məlumatına görə, tədbirdə çıxış edən Bakı Şəhəri üzrə Təhsil İdarəsinin (BŞTİ) müdiri Nailə Rzaquliyeva paytaxt məktəblərinin son illər əldə etdiyi uğurlardan danışıb.

O bildirib ki, BŞTİ-nin tabeliyində 316 orta, 3 əsas, 5 yardımçı, 1 evdə təhsil, cəzaçəkmə müəssisəsində axşam məktəbi var. Bu məktəblərdə 311 min 695 nəfər şagirdin təlim-tərbiyəsi ilə 29 min 870 nəfər müəllim məşğul olur. N.Rzaquliyevanın sözlərinə görə, yeni tədris ilində Bakıda 5060 şagird yerlik 7 məktəb binası inşa edilib. Paytaxtdakı 8 məktəbdə şagird sıxlığının aradan qaldırılması üçün 3180 yerlik əlavə korpus tikilərək istifadəyə verilib.

N.Rzaquliyeva deyib ki, 2006-2012-ci illərdə ali məktəblərə qəbul imtahanları zamanı aşağı nəticələr göstərən məzunların sayı azalıb, yüksək nəticə göstərən məzunların sayı artıb. Məzunlarının 50 faizindən çoxu tələbə adı qazanan təhsil müəssisələrinin sayında ciddi artım qeydə alınıb.

N.Rzaquliyeva Heydər Əliyev Fondunun prezidenti Mehriban Əliyevanın müəllimlərə ünvanladığı təbrik müraciətini də oxuyub.

Tədbirdə çıxış edən təhsil naziri Misir Mərdanov qeyd edib ki, Azərbaycanda təhsil işçilərinin özünəməxsus çəkisi var. Ölkədə təhsil sahəsinin sürətlə inkişaf etdiyini deyən nazir bildirib ki, Azərbaycanda təhsil almaq üçün münbit şərait yaranıb. M.Mərdanov onu da qeyd edib ki, hər il Müəllimlər Günü ilə bağlı dövlət tərəfindən müəllimlərin əməyi qiymətləndirilir. Bu il də ölkə başçısının sərəncamı ilə bir qrup təhsil işçisi mükafatlandırılıb.