Sosial

Ana səhifə

Sosial

Azərbaycan Təhsil İşçiləri Azad Həmkarlar İttifaqı Ukrayna və Estoniyanın müvafiq qurumları ilə müqavilə imzalayıb

09 oktyabr 2012 15:53 (UTC +04:00)

Bakı. Sevil Zeynalqlzı - APA. Bu gün Azərbaycan Təhsil İşçiləri Azad Həmkarlar İttifaqı Respublika Komitəsinin sədri Səttar Mehbalıyev Ukrayna Elm və Təhsil İşçiləri Həmkarlar İttifaqının sədr müavini Sergey Romaniuk və Estoniya Təhsil İşçiləri Birliyinin prezidenti Sven Rondikin rəhbərlik etdiyi nümayəndə heyətini qəbul edib.

APA-nın məlumatına görə, görüşdə S.Mehbalıyev qonaqlara Azərbaycanda həmkarlar təşkilatlarının fəaliyyəti ilə bağlı məlumat verib.

Komitə sədri onu da qeyd edib ki, Azərbaycanın 20% torpaqlarının Ermənistan dövləti tərəfindən işğal olunması nəticəsində 1 milyondan artıq vətəndaşımız doğma yurd-yuvasından didərgin düşüb, minlərlə təhsil müəssisəsi işğalçılar tərəfindən dağıdılıb.

S.Romaniuk və S.Rondik təmsil etdikləri qurumların fəaliyyətləri ilə bağlı məlumat verib. Onlar Azərbaycanın müvafiq qurumları ilə əməkdaşlıq etməkdə və təcrübə mübadiləsi aparmaqda maraqlı olduqlarını bildiriblər. Sonda Azərbaycan Təhsil İşçiləri Azad Həmkarlar İttifaqı Respublika Komitəsi ilə həmin qurumlar arasında ikitərəfli əməkdaşlıq müqavilələri imzalayıb. Müqavilədə elm və təhsil işçilərinin sosial, iqtisadi, əmək hüquqlarının qorunması, əməkdaşlığın inkişafı və möhkəmləndirilməsi, təminatı və müdafiəsi, təhsil sahəsində dövlət siyasətinin formalaşdırılmasında həmkarlar ittifaqlarının rolunun artırılması, həmkarlar ittifaqlarının fəaliyyət metodikasının təkmilləşdirilməsi və təcrübə mübadiləsinin aparılması və digər məsələlər öz əksini tapıb.