Sosial

Ana səhifə

Sosial

Ombudsman BMT QAK-ın Azərbaycandakı nümayəndəsini qəbul edib

09 oktyabr 2012 16:54 (UTC +04:00)

Bakı – APA. Azərbaycanın İnsan Hüquqları üzrə Müvəkkili (Ombudsman) Elmira Süleymanova BMT-nin Qaçqınlar üzrə Ali Komissarlığının (BMT QAK) Azərbaycandakı nümayəndəsi Daq Siqurdsonu qəbul edib.

Ombudsman Aparatının mətbuat xidmətindən APA-ya verilən xəbərə görə, görüşdə Ombudsmanla BMT QAK arasında qaçqın və məcburi köçkünlərin hüquqlarının müdafiəsi üzrə əməkdaşlığın davam etdirilməsi və daha da genişləndirilməsi, gələcək fəaliyyət perspektivləri haqqında fikir mübadiləsi aparılıb.

Müvəkkil Ermənistanın Azərbaycana qarşı iyirmi ildən artıq müddətdə davam edən təcavüzü nəticəsində məcburi köçkünlərin pozulmuş hüquqlarının müdafiəsinin ölkədə prioritet problem olduğunu, doğma ocaqlarından didərgin salınmış soydaşlarımızın bütün qayğılarının dövlətin gündəlik qayğısına çevrildiyini söyləmiş, bu gün respublika əhalisinin hər 8-9 nəfərdən birinin qaçqın və ya məcburi köçkün olduğunu vurğulayıb.

D.Siqurdson son illər Azərbaycanda qaçqın və məcburi köçkünlərin vəziyyətinin yaxşılaşdırılması, bu qəbildən olan əhalinin hüquqi müdafiəsinin möhkəmləndirilməsi, problemlərinin həlli istiqamətində mühüm işlər görüldüyünü və bunun dünyanın oxşar problemi ilə qarşılaşan əksər ölkələr üçün nümunə olduğunu söyləyib. O, Müvəkkilin bu sahədə fəaliyyətini yüksək qiymətləndirərək, Ombudsman təsisatı ilə əməkdaşlıqda maraqlı olduğunu qeyd edib, qarşılıqlı əlaqələrin əhəmiyyətini vurğulayıb.