Sosial

Ana səhifə

Sosial

Qurban Yetirmişli: “Şamaxı-İsmayılı bölgəsində güclü təkan ətrafdakı zəlzələ ocaqlarını oyatmaq imkanına malikdir”

10 oktyabr 2012 12:39 (UTC +04:00)

Bakı. Kəmalə Quliyeva – APA. “Şamaxı-İsmayılı bölgəsində güclü təkanın olması ətrafda olan zəlzələ ocaqlarını oyatmaq imkanına malikdir”. APA-nın məlumatına görə, bunu Azərbaycan Milli Elmlər Akademiyasının (AMEA) Respublika Seysmoloji Xidmət Mərkəzinin baş direktoru Qurban Yetirmişli ölkədə baş verən son seysmik proseslərlə bağlı keçirdiyi mətbuat konfransında bildirib.

Onun sözlərinə görə, Mərkəzin son illərdə apardığı bütün araşdırmaların nəticəsinə əsasən, Azərbaycanda seysmoloji bölgələrin ən aktivi Şamaxı-İsmayıllı zonasıdır: “Bu zona gərgin olaraq qalır. Oktyabrın 7-də baş verən zəlzələ zəif deyildi. 40 kilometr dərinlikdə olduğuna görə, bu zəlzələ əksər rayonlarda hiss olunsa da, dağıntı yaratmadı. Müqayisə üçün deyim ki, Zaqatalada baş verən zəlzələ elə təxminən bu gücdə - 5,6-5,7 maqnitudada olmuşdu. Lakin dərinliyi 8-10 kilometr olduğundan dağıntı yaratdı. Dünən Şamaxıda, bu gecə Mingəçevirdə baş verən zəlzələlərin olması təbiidir. Çünki zona gərgindir və aktivlik davam edir. Güclü təkanın olması ətrafda olan zəlzələ ocaqlarını oyatmaq imkanına malikdir. Bu təkanlardan sonra qırılmalar boyunca təkanlar olacaq”.