Sosial

Ana səhifə

Sosial

Ombudsman Aparatında Azərbaycanın dövlət müstəqilliyinin bərpasının 21-ci ildönümü qeyd olunub

18 oktyabr 2012 16:59 (UTC +04:00)

Bakı – APA. Bu gün Ombudsman Aparatında Azərbaycanın dövlət müstəqilliyinin bərpasının 21-ci ildönümü münasibətilə toplantı keçirilib.

Ombudsman Aparatının mətbuat xidmətindən APA-ya verilən məlumata görə, İnsan Hüquqları üzrə Müvəkkil E.Süleymanova 1991-ci il oktyabrın 18-də qəbul edilən «Azərbaycanın dövlət müstəqilliyi haqqında» Konstitusiya Aktının müstəqil respublikamızın dövlət quruluşu, siyasəti və iqtisadi inkişafının əsaslarını müəyyən etdiyini söyləyib.

Eyni zamanda dövlət müstəqilliyi bərpa edildikdən sonra ölkəmizdə demokratik, hüquqi islahatların həyata keçirilməsinə başlandığı və insan hüquqlarının səmərəli təmini məqsədilə institusional mexanizmlərin təsis edildiyi vurğulanıb.

Ombudsman Aparatının rəhbəri A.Səfixanlı çıxış edərək müstəqilliyin ilk illərində qəbul edilmiş sənədlər, Azərbaycanın dövlət müstəqilliyinin bərpası haqqında 30 sentyabr 1991-ci il tarixli Bəyannamə, 18 oktyabr 1991-ci il tarixli Azərbaycan Respublikasının dövlət müstəqilliyi haqqında Konstitusiya Aktı, həmçinin müstəqillik dövründə həyata keçirilən məhkəmə-hüquq, qanunvericilik islahatları, Ombudsman təsisatının pozulmuş hüquq və azadlıqların bərpası istiqamətində fəaliyyəti, Ombudsmanın təklifi ilə 18 iyun tarixinin milli insan hüquqları günü kimi qeyd olunması və digər fəaliyyət istiqamətləri barədə ətraflı məlumat verib.

Sektor müdiri F.Həsənov Ombudsmanın Gəncə, Şəki, Quba və Cəlilabad regional mərkəzləri tərəfindən bir çox rayon və kəndlərdə dövlət müstəqilliyinin ildönümünə həsr olunmuş maarifləndirmə tədbirlərinin keçirildiyini diqqətə çatdırıb.

Digər çıxış edənlər də müstəqillik illəri ərzində Ombudsman Aparatı tərəfindən həyata keçirilmiş tədbirlər, qanunvericiliyin beynəlxalq standartlara uyğun təkmilləşdirilməsi, əhalinin müxtəlif qruplarının hüquqlarının müdafiəsi, dövlət orqanlarının fəaliyyətinin insan hüquqlarının təmini baxımından təkmilləşdirilməsi, hüquqi maarifləndirmə fəaliyyətinin həyata keçirilməsi, beynəlxalq təşkilatlarla əməkdaşlıq və digər fəaliyyət istiqamətləri haqqında məlumat veriblər.