Sosial

Ana səhifə

Sosial

Göyçayın iki kəndinə təbii qaz verilib

20 oktyabr 2012 11:33 (UTC +04:00)

Göyçay. Elvin Yaqubov - APA. Göyçay rayonunun Kürdəmiş və Türkmən kəndlərinə təbii qaz verilib. APA-nın məlumatına görə, bu münasibətlə keçirilən mərasimdə rayon İcra Hakimiyyətinin başçısı Mənsur Məmmədov, “Azəriqaz” İstehsalat Birliyi baş direktorunun müavini Qağaməli Seyfullayev, birliyin tikinti departamentinin rəis müavini Fizuli Məmmədov çıxış edərək kənd sakinlərini təbrik ediblər. Sonra kəndlərə təbii qazın verilməsi münasibətilə rəmzi məşəl alovlandırılıb. Mərasim iştirakçıları evlərə baş çəkərək mavi yanacağın təzyiqini yoxlayıblar.

Bildirilib ki, 21 illik fasilədən sonra Göyçay rayonunun Kürdəmiş və Türkmən kəndlərinə 16 min 696 metr uzunluğunda müxtəlif diametrli magistral və daxili qaz xətti çəkilib. Kürdəmiş kəndində 348, Türkmən kəndində isə 60 abonentin evi fərdi tənzimləyici sayğacla təmin olunub. Hazırda Bığır, Qubadlı Şıxlı, Cəyirli kəndlərinin qazlaşdırılması, Potu, Ulaşlı-Şıxlı və Kürd kəndlərində istismara yararsız olan yeraltı polad qaz xətlərinin polietilen borularla əvəz edilməsi istiqamətində işlər davam etdirilir. Bu günə qədər Göyçay şəhərində və 14 kənddə 12 min 294 mənzil qazlaşdırılıb. Hazırda rayonda ümumi abonentlərin 46 faizi təbii qazdan istifadə edir və ilin sonunadək bu göstəricinin 60 faizə çatdırılması nəzərdə tutulur. 2014-cü ilədək rayonun bütün kəndlərinin qazlaşdırılacağı bildirilib.