Sosial

Ana səhifə

Sosial

Bakıda dönərlərlə bağlı aparılan yoxlamaların nəticəsi noyabrın sonuna kimi açıqlanaq

01 noyabr 2012 09:08 (UTC +04:00)

Bakı. Könül Kamilqızı - APA. “Səhiyyə Nazirliyinin Respublika Gigiyena və Epidemiologiya Mərkəzinin dönərlər üzərində apardığı araşdırmalar hələ ki davam edir. Bununla bağlı bütün məlumatlar və yekun nəticələr noyabr ayının sonuna kimi açıqlanaq”. Bu barədə APA-ya RGEM-in qidalanma gigiyenası bölməsinin müdiri İmran Abdullayev məlumat verib.

O bildirib ki, Qurban bayramı ilə əlaqədar araşdırmalar bir müddət dayandırılıb. Bayrama kimi cəmi iki yerdə yoxlamaların aparıldığını deyən İ.Abdullayev qeyd edib ki, hər zaman olduğu kimi, bu dəfə də dönər satışı sahəsində müəyyən problemlər aşkarlanıb: “Bu sahədə bəzi obyektlərin sənədləri düzgün deyil, fəaliyyət göstərmələri üçün VÖEN yoxdur, dönəri hazırlamaq üçün ətin haradan alınması məlum deyil və s. Normativ sənədlərdə də göstərildiyi kimi, ən vacib məsələlərdən biri çiy dönərin standartlara uyğun olaraq hazırlanmasıdır. Dönərlərlə bağlı ilkin xam maldan çox şey asılıdır. Çünki ilkin xammal düzgün seçilməli və standartlara uyğun hazırlanmalıdır. Bundan əlavə, dönər bişirildikdən sonra 1 saat müddətdə istifadə edilməlidir. Müəyyən edilən vaxtdan sonra ondan istifadə istehlakçıya müəyyən fəsadlar yarada bilər. Bəzən dönər müəyyən yerlərə sifariş olunur və müəyyən müddətdə ora çatdırılır. Amma biz standartlar müəyyən etmişik ki, bişmiş dönərlər sifariş edilən əraziyə 1 saat müddətinə çatdırılsın və istifadə edilsin”.

İ.Abdullayev vurğulayıb ki, konkret neçə obyektdə araşdırma aparılacağını demək çətindir. Onun sözlərinə görə, hər bir dönər satılan ərazidə müəyyən nəticələr aşkarlanır və bəzi obyektlərdə problemlər olur: “Bizim yoxlama aparmaqda məqsədimiz odur ki, dönərlərlə bağlı yeni standartlar barədə istehsalçılara ətraflı məlumat verək və məhsul bu qaydalara uyğun olaraq hazırlansın”.