Sosial

Ana səhifə

Sosial

Təhsil Nazirliyinin şöbə müdiri: “Azərbaycanda hələlik bütün tələblərə cavab verən müasir tipli peşə təhsili müəssisəsi yoxdur”

03 noyabr 2012 07:30 (UTC +04:00)

Bakı. Könül Kamilqızı-APA. “Artıq insanlar başa düşüblər ki, peşə təhsili almaq heç də ayıb deyil və bunun sonradan hansısa müsbət nəticələri olacaq. Təbii ki, peşə təhsili sahəsində 20 il ərzində yığılan problemləri 5 il ərzində həll etmək mümkün deyil. Bunun üçün ilk növbədə peşə təhsilinə olan münasibət dəyişilməlidir”. Bu açıqlamanı APA-ya Təhsil Nazirliyinin texniki-peşə təhsili şöbəsinin müdiri Namiq Məmmədov bu sahədəki mövcud problemlərə aydınlıq gətirərkən deyib.

O bildirib ki, peşə təhsili sahəsinin inkişafına bir çox problemlər mane olur. N. Məmmədovun sözlərinə görə, maddi-texniki bazaların işlənməsi sahəsində əlaqələr genişləndirilməlidir: “Hələ də müəssisələrdə dərslik, işə götürənlərlə səmərəli əməkdaşlıq əlaqələrin qurulması problemləri var. Ölkəmizdə hələlik bütün tələblərə cavab verən müasir tipli peşə təhsili müəssisəsi yoxdur. Bundan əlavə, peşə təhsili müəssisələrində 13 minə yaxın qaçqın və məcburi köçkün məskunlaşıb və bu da mövcud sahənin inkişafına böyük problemlər yaradır”.

N. Məmmədov qeyd edib ki, Azərbaycanda peşə təhsili ilə bağlı işlərə 2007-ci ildən başlanıb: “Bu illər ərzində bir sıra məzmun islahatı həyata keçirilib. Əgər 2007-ci ilə kimi Azərbaycanda 1 dənə də olsun yeni peşə təhsili müəssisəsi təmir olunaraq istifadəyə verilməmişdisə, bu illər ərzində 20-yə yaxın peşə təhsil müəssisəsi əsaslı təmir edilib, 3 yeni peşə təhsili müəssisəsi istifadə verilib. Bu yaxınlarda Heydər Əliyev Fondu tərəfindən təmir edilən 5 nömrəli peşə məktəbində isə kino-televiziya sahəsi üzrə mütəxəssislərin hazırlanmasına başlayıb. Bu isə keçmiş SSRİ məkanında mövcud sahə üzrə mütəxəssis hazırlayan ən müasir peşə təhsili müəssisəsidir”.