Sosial

Ana səhifə

Sosial

Azərbaycanda pullu tibb fəaliyyəti ilə məşğul olacaq xarici mütəxəssislər Səhiyyə Nazirliyindən şəhadətnamə alacaq - FOTO

Azərbaycanda pullu tibb fəaliyyəti ilə məşğul olacaq xarici mütəxəssislər Səhiyyə Nazirliyindən şəhadətnamə alacaq - <font color=red>FOTO</font>

06 noyabr 2012 15:28 (UTC +04:00)

Bakı. Könül Kamilqızı – APA. “Klinikalar dəvət etdikləri xarici mütəxəssislərdən onlar ölkəyə gəlməzdən öncə müvafiq sənədləri tələb edib elektron formada Səhiyyə Nazirliyinə təqdim edə biləcək”. Bunu səhiyyə nazirinin müavini Elsevər Ağayev xarici ölkə vətəndaşlarının Azərbaycan Respublikasında tibb və əczaçılıq fəaliyyəti ilə məşğul olmalarının ümumi qaydalarının təqdimatına həsr olunmuş toplantıda bildirib. Səhiyyə Nazirliyindən APA-ya verilən xəbərə görə, toplantının keçirilməsində əsas məqsəd tədbirə dəvət olunmuş özəl tibb müəssisələri rəhbərlərini Nazirlər Kabinetinin qərarı ilə tənzimlənən əmək miqrasiyası proseslərinin hüquqi tərəfləri barədə məlumatlandırmaq və bu prosesdən irəli gələn məsələlərə aydınlıq gətirmək olub.

Elsevər Ağayev xarici mütəxəssislərin ölkədə tibbi fəaliyyətlə məşğul olmaq istəyini, əhaliyə səviyyəli tibbi xidmət göstərmələrini təqdirəlayiq hal hesab edib. O bildirib ki, bütün bu proseslər ölkə qanunları çərçivəsində tənzimlənməlidir. Nazir müavininin sözlərinə görə, rəsmi qaydalara əsasən, ölkəyə qonaq qismində və hər hansı konfransda iştirak məqsədi ilə gələn əcnəbi tibb mütəxəssisləri istisna olmaqla, haqqı ödənilən tibbi əmək fəaliyyəti ilə məşğul olacaq hər bir tibb işçisi Səhiyyə Nazirliyinin müvafiq şəhadətnaməsini almalı və bu şəhadətnamənin əsasında Dövlət Miqrasiya xidmətindən əmək vizası əldə etməli, daha sonra əmək müqaviləsi imzalanmalıdır.

O qeyd edib ki, bütün bu məsələləri nəzərə alaraq, prosedurların yüngülləşdirilməsi məqsədi ilə yaradılmış elektron xidmətin Elektron Xidmətlər siyahısına daxil olunmasına dair Nazirlər Kabinetinə müraciət olunub. Nəticədə Səhiyyə Nazirliyi tərəfindən yaradılmış e-xidmət Nazirlər Kabinetinin ümumi elektron xidmətlər siyahısına daxil edilib. Sözügedən elektron xidmət xarici ölkələrdə hazırlıq keçən tibb və əczaçılıq işçilərinin Azərbaycanda tibb və əczaçılıq fəaliyyəti ilə məşğul olmağa buraxılması məqsədi ilə yaradılıb. Klinikalar dəvət etdikləri xarici mütəxəssislərdən onlar ölkəyə gəlməzdən öncə müvafiq sənədləri tələb edib elektron formada e-xidməti vasitəsi ilə Səhiyyə Nazirliyinə təqdim edə biləcək.

Toplantıda iştirak edən Dövlət Miqrasiya Xidmətinin Miqrasiya Proseslərinin idarə olunması Baş İdarəsinin rəisi İsmayıl Abdullayev öz çıxışında vurğulayıb ki, qeyd olunan məsələnin səhiyyə sektorunda özünəməxsus tərəfləri var. Onun sözlərinə görə, hər bir şəxs ölkədə əmək haqqı ödənilən əmək fəaliyyəti ilə məşğul olmazdan öncə xüsusi razılıq almalı, təsdiq olunmuş proseduralardan keçməlidir. İ.Abdullayev çıxışının sonunda iştirakçıları “Əmək miqrasiyası haqqında” qanunda əks olunmuş ümumi müddəalarla tanış edib.

Sonda Səhiyyə Nazirliyinin saytında yerləşdirilmiş “Xarici ölkədə hazırlıq alan tibb və əczaçılıq işçilərinin Azərbaycan Respublikasında tibbi və əczaçılıq fəaliyyəti ilə məşğul olmağa buraxılması ilə bağlı e- xidmət” tədbir iştirakçılarına təqdim edilib.