Sosial

Ana səhifə

Sosial

Bakıda “Böyük miqyaslı tədqiqat layihələri - 2012: Yüksək texnologiyalar üçün materialşünaslıq və informatika” adlı beynəlxalq konfrans keçirilir - FOTO

10 noyabr 2012 09:04 (UTC +04:00)

Bakı. Könül Kamilqızı – APA. Azərbaycan Milli Elmlər Akademiyasında (AMEA) “Böyük miqyaslı tədqiqat layihələri-2012: Yüksək texnologiyalar üçün materialşünaslıq və informatika” adlı beynəlxalq konfrans işə başlayıb. APA-nın xəbərinə görə, tədbir Elmin İnkişafı Fondunun İcraçı direksiyasının maliyyə və təşkilatı dəstəyi və AMEA Fizika İnstitutunun təşkilatçılığı ilə keçirilir. Konfransın keçirilməsinə ARDNŞ dəstək verir.
Tədbiri giriş sözü ilə açan AMEA-nın prezidenti Mahmud Kərimov bildirib ki, 2001-ci ildə UNESCO-nun Baş konfransının 31-ci sessiyası noyabr ayının 10-nu "Sülh və inkişaf naminə ümumdünya elm günü" elan edib. Onun sözlərinə görə, məqsəd beynəlxalq və milli səviyyədə elmin rolunu yüksəltmək, eləcə də elmi nəticələrin cəmiyyətin dinc və sabit inkişafına təsirini artırmaqdır: “Elmin İnkişafı Fondu 2010-cu ildən etibarən Ümumdünya Elm Gününü qeyd edir. Bu ilki Ümumdünya Elm Gününün devizinə “Elm-Qlobal davamlılıq naminə: Qarşılıqlı əlaqəlilik, Əməkdaşlıq, Transformasiya” uyğun olaraq - Elmin İnkişafı Fondunun İcraçı direksiyasının maliyyə və təşkilati dəstəyi ilə “Böyük miqyaslı tədqiqat layihələri - 2012: Yüksək texnologiyalar üçün materialşünaslıq və informatika” adlı beynəlxalq konfrans keçirilir. Beynəlxalq konfransın keçirilməsində məqsəd adıçəkilən pilot qrant layihələrin nəticələrinin və digər elmi-tədqiqat işləri üzrə nəticələrin yüksək səviyyədə müzakirəsinin keçirilməsi, həmçinin mövcud əlaqələrin gücləndirilməsi və yeni əlaqələrin yaradılmasıdır”.

Elmin İnkişafı Fondunun icraçı direktoru Elçin Babayev isə bildirib ki, beynəlxalq konfransda Yaponiya, Almaniya, Fransa və ABŞ kimi ölkələrin alim və mütəxəssisləri iştirak edir. Onun sözlərinə görə, bu konfransın keçirilməsi pilot layihə haqqında fikir yürüdülməsinə şərait yaradacaq, eyni zamanda elmin qabaqcıl sahələri barəsində alimlər arasında ünsiyyətin qurulması və elm sahəsində islahatların aparılmasına imkan verəcək.
Tədbirin davamında çıxış edən AMEA-nın Fizika İnstitutunun direktor müavini Nazim Məmmədov pilot layihə barədə ətraflı məlumat verib.

Qeyd edək ki, konfrans işini noyabrın 11-də davam etdirəcək.