Bakı-APA. Bakı Ali Neft Məktəbinin rektoru Elmar Qasımov və Azərbaycan Akademik Milli Dram Teatrının direktoru İsrafil İsrafilov hər iki qurum arasında əməkdaşlıq əlaqələrinin yaradılması ilə bağlı müqavilə imzalayıblar. Bakı Ali Neft Məktəbinin mətbuat xidmətindən APA-ya verilən məlumata görə, əməkdaşlığın məqsədi məktəbin tələbələrinin mədəni səviyyəsinin yüksəldilməsi, onların dünya görüşlərinin genişləndirilməsi və sosial-mədəni tələblərinin ödənilməsidir.
Müqavilə çərçivəsində Bakı Ali Neft Məktəbi mütəmadi olaraq teatrın repertuar cədvəli haqqında əvvəlcədən məlumatlar əldə edəcək və tələbələrin zövqünü formalaşdırmaq üçün onların dünya ədəbiyyatı və Azərbaycan klassiklərinin əsərləri əsasında qoyulmuş tamaşaları kollektiv şəkildə seyr etmələrinə şərait yaradılacaq. Bu zaman dövlətçilik, vətənpərvərlik və qəhrəmanlıq mövzularında qoyulmuş səhnə əsərlərinə baxışların təşkilinə xüsusi önəm veriləcək. Ən azı ayda bir dəfə ali məktəbin bütün kollektivi bir tamaşaya baxacaq.
Əməkdaşlıq çərçivəsində həyata keçirilən tədbirlər professor-müəllim heyəti və tələbə ictimaiyyəti tərəfindən maraqla qarşılanıb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
