APA-nın məlumatına görə, açılış mərasimində Azərbaycan Prezidenti İlham Əliyevin qurultay iştirakçılarına təbrik məktubu oxunub. Məktubu qurultay iştirakçılarına Prezident Administrasiyasının rəhbəri Ramiz Mehdiyev təqdim edib.
Sonra qurultayda bir sıra beynəlxalq təşkilatların, xarici ölkələrin həmkarlar ittifaqlarının, o cümlədən Beynəlxalq Əmək Təşkilatının, Beynəlxalq Həmkarlar İttifaqları Konfederasiyasının, Rusiya, Türkiyə, Ukrayna və digər ölkələrin həmkarlar ittifaqları mərkəzlərinin nümayəndələri çıxış ediblər.
Azərbaycan Həmkarlar İttifaqları Konfederasiyasının sədri Səttar Mehbalıyev hesabat məruzəsi ilə çıxış edib. S. Mehbalıyev bildirib ki, son 5 ildə AHİK-in iştirakı ilə 113 qanunvericilik aktı və normativ sənədlər qəbul olunub: “İllik statistik hesabatlarının təhlili göstərir ki, hər il müəssisələrdə qeydə alınan pozuntuların yarıdan çoxunu əmək normalarının pozulması halları təşkil edir. Ötən beş ildə 158889 nəfərin istirahət və müalicəsini təşkil etmişik. Həmkarlar ittifaqları bunun üçün 70,7 milyon manat vəsait xərcləyib. Həmkarlar ittifaqlarının fəallığı sayəsində təkcə ötən il işəgötürənlərlə 12366 kollektiv müqavilə və 121 saziş bağlanıb”.
S. Mehbalıyev qeyd edib ki, son 5 ildə transmilli şirkətlərin 28 müəssisəsində həmkarlar ittifaqı təşkilatları təsis edilib: “Ümumilikdə hesabat dövründə 1102 yeni həmkarlar ittifaqı təşkilatları yaradılıb. Bu təşkilatlar 148448 nəfəri birləşdirir. Təkcə Naxçıvan Muxtar Respublikasında son 5 ildə 3000 nəfərdən yuxarı həmkarlar ittifaqı üzvünü əhatə edən 639 həmkarlar ittifaqı təşkilatı fəaliyyətə başlayıb. Göstərilən səylər nəticəsində ölkəmizdə həmkarlar ittifaqı üzvlərinin sayı 1 600 000 nəfərə çatıb”.
Qurultayda AHİK-in Təftiş komissiyasının hesabatı dinlənilib, Konfederasiyasının Nizamnaməsində dəyişikliklər və əlavələrə baxılıb, qurumun fəaliyyətinin əsas istiqamətləri müəyyənləşib.
Prezident Administrasiyası ictimai-siyasi şöbəsinin müdiri Əli Həsənov isə çıxışında həmkarlar ittifaqlarının fəaliyyəti, Azərbaycan dövlətinin bu qurumlara baxışı haqda danışıb. Ə. Həsənov deyib ki, dövlət həmkarlar ittifaqlarını özünə rəqib deyil, tərəfdaş kimi görür: “Həmkarlar ittifaqlarının fəaliyyətini dəstəkləyirik”.
Ə. Həsənov AHİK-in qurultayında İlham Əliyevin prezidentliyə namizədliyinin irəli sürülməsinə də münasibət bildirib: “İstiqamət baxımından həmkarlar ittifaqı ilə dövlət bir-birinə dost qurumlar deyil. Lakin bu gün qurultayda həmkarlar ittifaqları İlham Əliyevin namizədliyinin dəstəklənməsi təşəbbüsü ilə çıxış etdilər. Bu bir daha işçilərin – həmkarların iqtidara olan münasibətini göstərir. Belə mövqe ancaq alqışlanmalıdır”.
Sonra təşkilati məsələlərə baxılıb. AHİK-in sədri vəzifəsinə keçirilən seçkidə Səttar Mehbalıyev növbəti müddət üçün qurumun rəhbəri seçilib.
Sonda isə qurultay iştirakçıları adında prezident İlham Əliyevə müraciət qəbul olunub.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
