Bakı. Kəmalə Quliyeva - APA. Bakı Dövlət Universitetinin (BDU) yataqxanalarından məcburi köçkünlərin köçürülməsi prosesi başa çatan kimi bu binaların sökülməsinə başlanacaq. Bunu APA-ya açıqlamasında BDU-nun iqtisadiyyat və təsərrüfat işləri üzrə prorektoru Nəbi Ramazanlı deyib.
Onun sözlərinə görə, yataqxanalar hamısı yararsız haldadır: “Ən yaxın zamanda 5 yataqxananın söküntüsünə başlanacaq. Bu yataqxanalarda olan az sayda tələbə müvəqqəti olaraq 8 və 9 saylı yataqxanalarda yerləşdiriləcək. Bundan sonra pilləli olaraq həmin yataqxanalar da söküləcək. Onların yerində müasir standartlara cavab verən kampuslar tikiləcək. Bizdə olan məlumata görə, bu ilin dövlət büdcəsindən BDU-nun yeni tələbə şəhərciyinin tikintisi üçün vəsait ayrılacaq. Vəsait ayrılan kimi tikintiyə başlanacaq”.
N.Ramazanlı deyib ki, hazırda BDU-nun tələbələrinin təxminən 40 faizinin - 10 minə yaxın tələbənin yataqxanaya ehtiyacı var. Ərazidə kampus tipli 5 bina tikiləcək.
BDU-nun prorektoru qeyd edib ki, dünəndən başlayaraq 8 və 9 saylı yataqxanalarda məskunlaşan məcburi köçkünlərin Müşfiqabad qəsəbəsində yerləşən yeni binalara köçürülməsi ilə bağlı püşkatma keçirilir. Bundan sonra qalan yataqxanaların köçürülməsinə başlanacaq.
Qeyd edək ki, BDU-nun 9 yataqxanasından 7-də məcburi köçkünlər məskunlaşıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
