Top oyunları

Ana səhifə

Top oyunları

Azərbaycan Çempionlar Liqasına 3 klubla qatılacaq

22 may 2012 09:48 (UTC +04:00)

Apasport.az saytının əldə etdiyi məlumata görə, Avropa Voleybol Konfederasiyası (CEV) ölkəmizə ötən illə müqayisədə bu dəfə 2 “wild card” verib.

Belə ki, 2012/13 mövsümündə Çempionlar Liqasında Azərbaycanı təmsil etmək üçün ölkəmizə 1 yer ayrılıb. Həmin vəsiqənin sahibi olan son dünya çempionu “Rabitə” ardıcıl üçüncü dəfə qitənin ən nüfuzlu klub turnirinə qatılacaq.

Super Liqanın yekununa əsasən, “wild card”ların sahibi “Lokomotiv” və “Bakı” olmalıdır. Lakin bürünc mükafatçı olan paytaxtın eyniadlı təmsilçisi CEV kubokunda oynamağa üstünlük verdiyindən, onları “Azərreyl” əvəzləyəcək. Bu, onların qitənin ən möhtəşəm turnirinin daimi iştirakçısı olması ilə də bağlıdır. Çünki “dəmiryolçular” həmişə analoji yarışda liderlərdən sayılıblar və 1 dəfə “Dördlər finalı”nın iştirakçıları olublar.

Qeyd edək ki, bu, Azərbaycan tarixində ilkdir. Ötən mövsüm avrokuboklara 5 klubla qatılaraq, yeni rekord müəyyənləşdirən ölkəmiz Çempionlar Liqasına da 3 klubla yollanmaqla, voleybol tariximizdə yeni səhifə açıb.

Qeyd edək ki, qitənin ən nüfuzlu klub turnirinin püşkü iyunun 29-da atılacaq. Avstriyanın paytaxtı Vyanada baş tutacaq tədbirdə həm kişi, həm qadın komandaların rəqibləri müəyyənləşəcək.