Bakı. Real Cəfərli - APA. İran Xarici İşlər Nazirliyinin sözçüsü Mərziya Əfxəm yerli və xarici jurnalistlər üçün keçirdiyi həftəlik mətbuat konfransında ölkə prezidentinin ABŞ-a səfərindən də danışıb. APA-nın “Fars” agentliyinə istinadən verdiyi məlumata görə, M. Əfxəm bildirib ki, BMT Baş Assambleyasının sessiyası dünya ölkələrinin iştirak etdiyi ən mühüm tədbirlərdən biridir: “Tədbirə dövlət başçıları və xarici işlər nazirlərinin qatılması unikal hadisədir. İran prezidentinin görüşləri və proqramı haqqında da münasib vaxtda məlumat veriləcək. Biz Həsən Ruhaninin Nyu-York səfəri haqda informasiyaları açıqlayacağıq”.
İran XİN sözçüsü bəyan edib ki, H. Ruhaninin Nyu-Yorkda ABŞ və Britaniya rəsmiləri ilə heç bir görüşü planlaşdırılmır: “Əgər proses hansısa görüşün keçirilməsinə doğru irəliləyərsə, bu, “altılıq” ölkələri çərçivəsində olacaq”.
İran XİN sözçüsü Tehranla London arasında münasibətlərin bərpa edilib-edilməyəcəyi məsələsinə də toxunub: “Böyük Britaniyanın baş naziri Devid Kameron İran prezidentinə məktub göndərib. O, məktubunda iki ölkə arasında əlaqələrin qurulması üçün maraqlı olduğunu ifadə edib. Biz də qayda-qanunlarımıza uyğun olaraq vəziyyəti araşdırırıq və araşdırmalarımızdan sonra fikirlərimizi açıqlayacağıq”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
