Bakı. Gülnar Bəşirova - APA. Bu gün Azərbaycan Milli Elmlər Akademiyasında (AMEA) akademik Azad Mirzəcanzadənin 85 illik yubileyinə həsr olunan “Neft-qaz sahəsində qeyri-Nyuton sistemlər” mövzusunda beynəlxalq elmi konfrans işə başlayıb.
APA-nın məlumatına görə, iki günlük tədbir Riyaziyyat və Mexanika İnstitutu, Azərbaycan Dövlət Neft Şirkəti, Azərbaycan Dövlət Neft Akademiyası və Başqırdıstan Elmlər Akademiyası tərəfindən təşkil edilib.
Konfransı AMEA-nın vitse-prezidenti, akademik Akif Hacıyev açaraq bildirib ki, görkəmli elm xadimi, texniki elmlər doktoru, mərhum akademik Azad Mirzəcanzadənin Azərbaycanda neft sənayesinin inkişafında müstəsna xidmətləri olub: "Unudulmaz alim ölkəmizin hazırkı inkişaf mərhələsində iqtisadiyyatın inkişafı üçün güclü elmi potensialın yaradılmasında yaxından iştirak edib".
ARDNŞ-ın vitse-prezidenti, akademik Xoşbəxt Yusifzadə mərhum alimin həyat və fəaliyyəti barədə geniş nitqlə çıxış edib: "Bakıda və xaricdə nəşr olunmuş kitabları, monoqrafiyaları Azad Mirzəcanzadəyə böyük uğur qazandırıb. Həmin o vəsaitlər xarici ölkələrdə dərslik kimi istifadə olunaraq elmə töhfələr verib".
Energetika naziri Natiq Əliyev bildirib ki, müdrik insan, böyük pedaqoq, əvəzedilməz müəllimin neft-qaz sənayesinin inkişafında mühüm rolu olub: "Akademik Azerbaycanda neft-qaz sənayesi sahəsində əldə olunan nailiyyətlərin dünya ictimaiyyətinə çatdırılmasında böyük işlər görüb. Son 15 ildə energetika sahəsində böyük nailiyyətlər əldə olunub, neft-qaz hasilatının həcmi dəfələrlə artıb".
Qeyd edək ki, konfransda Milli Məclis sədrinin müavini Valeh Ələsgərov, ADNA-nın rektoru Siyavuş Qarayev, Başqırdıstan EA-nın prezidenti Ramil Baxtizin, Rusiya Təbiət Elmlər Akademiyasının birinci vitse-prezidenti Lida İvanitskaya çıxış ediblər.
Qeyd edək ki, konfrans noyabrın 22-də başa çatacaq.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
