Amerika

Amerika

Xocalı faciəsinin ildönümü ilə əlaqədar ABŞ-ın bir neçə konqresmenləri Nümayəndələr Palatasında çıxış ediblər

27 fevral 2010 02:41 (UTC +04:00)

Vaşinqton. İzabel Levin-APA. ABŞ-ın Pensilvaniya ştatından olan konqresmen Bill Şuster, Texas ştatından olan konqresmen Solomon Ortiz və Nyu York ştatından olan konqresmen Maykıl Mak-Mehan Xocalı faciəsinin ildönümü ilə əlaqədar nümayəndələr Palatasında çıxış ediblər.
APA-nın Vaşinqton müxbirinin verdiyi məlumata görə, konqresmen Bill Şuster qeyd edib ki, 1992-ci ilin fevral ayının 26-da Azərbaycanın Xocalı şəhərində baş vermiş faciə nəticəsində şəhər və şəhərin sakinləri tamamilə məhv edilib.
Həmin vaxt bu faciə haqqında Amerikanın «Boston Globe», «Washington Post», «New York Times», «Financial Times», Avropa və Rusiyanın KİV-də geniş məlumat verilib. «Bu faciədən 18 il keçəndən sonra dünya ictimaiyyəti Xocalı məsələsinə çox az diqqət yetirir», – deyə o vurğulayıb.
B.Şuster Xocalı haqda danışaraq, bu şəhərin qısa coğrafiyasını və faciənin tarixini xatırladıb. «Azərbaycan şəhəri olan Xocalı bu gün Ermənistanın işğalı altındadır. Əhalisi təxminən 7.000 nəfərdən ibarət olan Xocalı şəhərinin əksəriyyətini etnik azərbaycanlılar təşkil etməklə yanaşı Dağlıq Qarabağ bölgəsinin ən böyük şəhəri hesab olunurdu. Xocalı qırğınını, etnik ermənilərin silahlı qüvvələri, Rusiyanın 366-cı motoatıcı alayının dəstəyi vasitəsilə törədiblər», - deyə konqresmen əlavə edib.
Azərbaycan Amerikanın strateji tərəfdaşı və dostu olduğun qeyd edən B.Şuster bütün həmkarlarını, bəşəriyyətə qarşı cinayət olan, Xocalı qırğınının qurbanlarını yad etməyə çağırıb.
Konqresmen Solomon Ortiz öz çıxışında qeyd edib ki, ermənilər Xocalıya hücum etməkdən əvvəl şəhəri bir müddət su və elektrik təchizatından kəsərək blokada saxlayıblar. Şəhərə quru ilə nəqliyyat vasitələri gedib gəlməyib. Ermənilər dinc əhaliyə şəhəri tərk etmək üçün dəhliz açacaqlarını desələr də, faciə axşamı həmin dəhliz vasitəsilə şəhəri Ağdam istiqamətində tərk edən insanlar ermənilərin vəhşi hücumuna məruz qalıblar. Nəticədə, 613 dinc sakin öldürülüb, onlardan 63 uşaq, 106 qadın, 70 isə qoca insanlar olub. 8 ailə tamamilə məhv edilib. 25 uşaq hər iki valideynini, 130 uşaq isə valideynlərindən birisini itirib, 76 uşaq olmaqla 487 insan yaralanıb, 1275 insan isə əsir götürülüb.
Konqresmen Maykıl Mak-Mehan öz həmkarlarının çıxışlarına dəstək olaraq Xocalı faciəsinin dəhşətləri haqqında danışıb. O xüsusilə Ermənilər tərəfindən dinc əhaliyə qarşı törədilən vəhşilikləri qeyd edib.