Bakı – APA. Türkiyənin Diyarbəkir şəhərində törədilən partlayış nəticəsində 3 nəfər ölüb, 42 nəfər yaralanıb. APA-nın məlumatına görə, bu barədə Diyarbəkir valisi administrasiyasının məlumatında bildirilir.
“Diyarbəkirin Bağlar rayonunda saxlanılan PKK terrorçularını həkim müayinəsinə aparan mikroavtobusun yaxınlığında minalanmış avtomobil partladılıb. Partlayış nəticəsində 12-si polis və 33-ü mülki şəxs olmaqla 45 nəfər yaralanıb, onlardan üçü sonradan xəstəxanada keçinib”, - deyə məlumatda bildirilir.
Hələlik heç bir qruplaşma partlayışa görə məsuliyyəti öz üzərinə götürməyib.
**** 18.18
Bakı – APA. Türkiyənin Diyarbəkir şəhərində polislərə qarşı terror aktı törədilib.
APA-nın Türkiyə xəbər agentliklərinə istinadən verdiyi məlumata görə, şəhərin Batıkənt meydanında polisləri daşıyan avtobusda partlayış baş verib. Nəticədə 15-i polis əməkdaşı olmaqla, çoxlu sayda insan yaralanıb.
Hadisə yerinə çoxlu sayda təcili yardım maşını göndərilib. Yaralılar xəstəxanalara daşınıb.