Bakı-APA. Bu gün İsveçrənin Sürix şəhərində FİFA-ya növbəti prezident seçkisi keçirilir.
Apasport.az saytının məlumatına görə, ali futbol qurumunun Növbədənkənar Konqresində prezidentlik uğrunda İordaniya şahzadəsi Əli bin əl-Hüseyn, UEFA-nın baş katibi Cianni İnfantino, Asiya Futbol Konfederasiyasının prezidenti Şeyx Salman ibn-İbrahim əl-Xəlifə, FİFA-nın sabiq baş katibinin köməkçisi Jerom Şampan mübarizə aparır.
Artıq seçkilərin ilk turu arxada qalıb. Ancaq bu turda qalib müəyyənləşməyib. Belə ki, ən çox səsi İnfantino yığıb. Ona 88 ölkənin milli federasiyası səs verib. Şeyx Salman ibn-İbrahim əl-Xəlifə 85, Əli bin əl-Hüseyn 27, Jerom Şampan isə cəmi 7 səs yığa bilib.
Nizamnaməyə görə heç bir namizəd qalib olmaq üçün lazım olan səslərin 2/3 hissəsini toplaya bilmədiyi üçün seçkinin nəticəsi növbəti turda müəyyənləşəcək.
Bu mərhələdə qalib olmaq üçün 50 faizdən 1 səs çox yığmaq lazımdır.
Yeni prezident 4 il müddətinə seçiləcək.
Qeyd edək ki, konqresdə AFFA-nı prezidenti Rövnəq Abdullayev, vitse-prezident Elşad Nəsirov və baş katib Elxan Məmmədov təmsil edir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
