Gürcüstan. Nizami Məmmədzadə - APA. Gürcüstan Mərkəzi Seçki Komissiyasının növbəti iclası keçirilib.
APA-nın Gürcüstan bürosunun məlumatına görə, MSK ikinci turun keçiriləcəyi seçki dairələrinin, təkrar səsvermə keçiriləcək seçki məntəqələrinin sayını və səsvermənin vaxtını müəyyən edib.
Seçkilərin 2-ci turu oktyabrın 30-da 48 majoritar seçki dairəsində keçiriləcək. Oktyabrın 22-də isə 2 seçki dairəsinin 4 seçki məntəqəsində təkrar səsvermə olacaq. Marneulidəki 36 saylı seçki dairəsinin Qızılhacılı kəndində yerləşən 48 saylı seçki məntəqəsində və Zuqdidi rayonundakı 66 saylı seçki dairəsinin 3 seçki məntəqəsində təkrar səsvermə nəticəsində qalib müəyyənləşməsə, həmin dairələrdə də ayın 30-da 2-ci tur keçiriləcək. Dairələrin böyük əksəriyyətində hakimiyyətdəki “Gürcü Arzusu” və əsas müxalif qüvvə olan Vahid Milli Hərəkat Partiyasının namizədləri mübarizə aparır.
Qeyd edək ki, oktyabrın 8-də keçirilən seçkilərdə “Gürcü Arzusu” 67 mandat, Vahid Milli Hərəkat Partiyası 27 mandat, “Vətənpərvərlər İttifaqı” isə 6 mandat qazanıb. Hakim partiya daha 46 dairədə qalib gələrsə, yeni parlamentdə konstitusion çoxluq (113 yer) əldə edəcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
