Xəbərlər

Azərbaycanda “Mimi” adlı it 2 kiloqram heroin tapdı

14:28

19 noyabr 2015

Dövlət Gömrük Komitəsinin əməkdaşları 2 kiloqrama qədər heroinin ölkə ərazisinə keçirilməsinin qarşısını alıblar. Komitədən APA TV-yə verilən məlumata görə, narkotik vasitə İrandan Azərbaycana gələn Məmmədov Emin Hidayət oğluna məxsus “Mersedes Benz-200” markalı, 90-GB-883 nömrəli minik avtomobilində aşkar edilib.

Astara Gömrük İdarəsinin əməkdaşları Sərnişin nəqliyyat şöbəsinin gömrük yoxlama xəttində avtomobilə gömrük nəzarətini həyata keçirən zaman “Mimi” ləqəbli kinoloji xidmət iti nəqliyyat vasitəsinin salonuna reaksiya verib. Bunu nəzərə alan gömrükçülər qanunvericiliyin tələbinə uyğun olaraq nəqliyyat vasitəsinə baxış keçirib.

Yoxlama zamanı avtomobilin salonunda, alətlər panelinin arxasında gömrük nəzarətindən gizlədilən, qara rəngli kauçuk məmulatına bükülü vəziyyətdə 5 ədəd uzunsov formalı bağlamada ümumi xalis çəkisi 1 kiloqram 850 qram narkotik vasitə - heroin aşkar edilərək götürülüb.