Xəbərlər

ABŞ və İran casusluqda suçlanan məhbusları azadlığa buraxdı

11:07

18 yanvar 2016

ABŞ və İran arasında məhbus mübadiləsinə dair əldə olunan razılığa əsasən, Evin həbsxanasında saxlanılan və ikili vətəndaşlığı olan 4 nəfər məhbusların mübadiləsi çərçivəsində azadlığa buraxılıb.

APA-nın Tehran bürosunun məlumatına görə, bunu Tehran şəhər prokuroru Abbas Cəfəri Dövlətabadi deyib.

Onun sözlərinə görə, İran Milli Təhlükəsizlik Şurasının qərarına əsasən azadlığa buraxılan şəxslər ABŞ-a casusluqda ittiham olunan Əmir Hikməti, “Washington Post” qəzetinin Tehrandakı müxbiri Jason Rezaian, Nüsrətullah Xosrəvi Rudsəri və iranlı keşiş Səid Abididir.

İranın azad etdiyi məhbusları aparan təyyarə ABŞ-ın Almaniyadakı Ramştayn hərbi bazasında eniş edib.

Məlumata görə, Amerikada həbsdə olan 7 İran vətəndaşı da azadlığa buraxılıb. Bundan başqa, ABŞ İnterpoldan 14 iranlının axtarışı ilə bağlı sorğusunu geri çəkib və İranın iki bankına qarşı sanksiyanı ləğv edib.