Xəbərlər

QƏBƏLƏDƏ ATIŞMA: şəriklərin davası 2 nəfərin ölümü ilə nəticələndi

20:11

13 dekabr 2013

Qəbələdə silahlı insident baş verib. APA TV-nini xəbərinə görə, mağaza müdiri və daha bir nəfər güllələnib. Hər iki şəxs aldığı güllə yarasından keçinib. Qəbələ Rayon Polis Şöbəsindən APA-ya verilən məlumata görə, rayonda bizneslə məşğul olan Arif Rəsulzadə ov tüfəngi ilə ortağı Eldar Kərimovu və Vasif Dadaşovu güllələyib. Hər iki şəxs aldıqları güllə yarasından keçinib.

İlkin məlumata görə, hadisəyə A. Rəsulzadə ilə E. Kərimov arasında mövcud biznes sövdələşməsi səbəb olub. Belə ki, E. Kərimov və A. Rəsulzadə ortaq olublar, sonradan bu ortaqlığa son qoyublar. Bütün məsələlər də bundan sonra başlayıb. Hər iki şəxs birgə işlətdikləri mağazadakı paylarını bölüşdürmək üçün məhkəməyə müraciət edib.

Məhkəmə mağazanın E. Kərimovda qalmasına qərar verib. Lakin A. Rəsulzadə məhkəmənin qərarına məhəl qoymayıb. Məhkəmə icraçıları mağazaya gedərək A. Rəsulzadəyə oranı boşaltmağı tövsiyə ediblər. Bu zaman iki ortaq arasında mübahisə düşüb və güllələnmə baş verib.