Xəbərlər

Ukraynalı uşaqlar Şəkiyə səfər edib

18:27

10 avqust 2023

Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin təşkilatçılığı ilə ölkəmizə gətirilərək düşərgələrdə yerləşdirilən və reabilitasiya tədbirlərinə cəlb edilən ukraynalı uşaqların bu gün Şəkiyə ekskursiyası təşkil edilib. Onlar Şəkidə yerləşən tarixi-memarlıq abidələri ilə tanış olublar, Xan Sarayı və Karvansaraya səfər ediblər. Uşaqlar Şəki mətbəxi ilə də tanış olublar. Şəki ekskursiyasının ardınca ukraynalı uşaqların sabah Şamaxıya səfərinin təşkili nəzərdə tutulur. Qeyd edək ki, 14 günlük sosial reabilitasiya proqramı çərçivəsində uşaqların emosional vəziyyətlərinin stabilləşməsinə, eləcə də cəmiyyətə inteqrasiyalarının təmin edilməsinə dəstək göstərilir. Onlar art-terapiya və peşəkar psixoloq tərəfindən fərdi və qrup terapiyalarına cəlb ediliblər. Düşərgə iştirakçıları psixo-sosial təlimlər, ingilis dili kursları, milli rəqslər, ustad dərslərində də iştirak edirlər. Vüqar Heydərov, Əhməd Fərruxoğlu, APA TV