Bakıda iki yeniyetmənin qaçırdığı avtomobil tapılıb.
DİN Mətbuat Xidmətindən APA-ya verilən məlumata görə, iyulun 14-də DİN-in "102 Zəng Mərkəzi"nə Səbail rayonunun R. Rza küçəsindən "Toyota" markalı avtomobilin qaçırılması barədə məlumat daxil olub.
Məlumatla əlaqədar Səbail RPİ-nin 39-cu Polis Bölməsinə dəvət olunan zərərçəkmiş Kamran Səlimov izahatında axşam evə qayıdarkən avtomobilini park etmək üçün açarları dayanacağın gözətçisinə verdiyini deyib. Gözətçi isə maşın sahibinin açarı səhər götürməsi üçün yaxınlıqdakı mağazanın satıcısına verdiyini bildirib.
Hadisə yerinə gələn polis əməkdaşları tərəfindən müvafiq araşdırmalar aparılıb. DİN-in Təhlükəsiz Şəhər Xidmətinin texniki imkanlarından istifadə edilməklə, avtomobilin Yasamal rayonu istiqamətində getdiyi müəyyənləşdirilib.
Əməliyyat-axtarış tədbirləri nəticəsində avtomobil Zərdabi küçəsində saxlanılmış vəziyyətdə tapılıb. Bir qədər sonra maşına yaxınlaşan iki yeniyetmə polis əməkdaşları tərəfindən şübhəli şəxs qismində saxlanılaraq avtomobillə birlikdə 39-cu Polis Bölməsinə gətirilib. Araşdırmalarla onların Bakı şəhər sakini R.T. və Mingəçevir şəhər sakini R.Ə. olmaları müəyyən edilib. Onlar törətdikləri əməli etiraf ediblər.
Müəyyən edilib ki, iyulun 14-nə keçən gecə saat 04.30 radələrində siqaret almaq üçün Səbail rayonunun R. Rza küçəsindəki mağazaya girən yeniyetmələr satıcının məşğul olmasından istifadə edərək orada olan avtomobil açarını götürüb uzaqlaşıblar və az sonra həmin avtomobili taparaq qaçırıblar.
Faktla əlaqədar Səbail RPİ-nin İstintaq şöbəsində araşdırma aparılır.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
