Bakı – APA. ADA Universitetinin Xəzər Enerji və Ətraf Mühit Mərkəzinin və SOCAR-ın birgə təşkil etdiyi IX Bakı Yay Enerji Məktəbinin iştirakçıları Bakı Ali Neft Məktəbində (BANM) olublar.
Bakı Ali Neft Məktəbinin mətbuat xidmətindən APA-ya verilən məlumata görə, Bakı Ali Neft Məktəbinin rektoru Elmar Qasımov qonaqlara rəhbərlik etdiyi ali məktəbin tarixi, fəaliyyət istiqamətləri və yarandığı qısa müddət ərzində əldə etdiyi uğurlar barədə məlumat verib, Azərbaycanda yüksək ixtisaslı, ingilisdilli, peşəkar kadrların hazırlanmasının BANM-in əsas hədəfi olduğunu vurğulayıb.
Xəzərin Azərbaycan sektorunda yeni yataqların kəşf olunduğunu deyən rektor bildirib ki, uğurlu neft strategiyası sayəsində ölkənin enerji təhlükəsizliyi təmin olunub, bölgə enerji təhlükəsizliyində Azərbaycan kimi etibarlı təchizatçı qazanıb.
Xatırladaq ki, ADA Universitetinin Xəzər Enerji və Ətraf Mühit Mərkəzi Azərbaycan Respublikası Dövlət Neft Şirkətinin (SOCAR) əməkdaşlığı ilə 4-17 iyul, 2015-ci il tarixlərində IX Bakı Yay Enerji Məktəbini keçirir. Bu il məktəbə 17 ölkədən 47 iştirakçı qoşulub.
Qeyd edək ki, iki həftə ərzində iştirakçılar enerji sahəsinin siyasi və iqtisadi əsasları, hüquqi bazası və digər fundamental mövzularla yanaşı, enerji və xarici siyasət, enerji və ətraf mühit kimi mövzularda da mühazirələr dinləyəcək, interaktiv məşğələlərdən yararlanacaqlar. İki həftəlik sertifikat proqramı enerji və ətraf mühit məsələlərini təhlil etmək üçün dünyanın tanınmış alim, mütəxəssis və siyasətçilərini bir araya gətirəcək. İştirakçılar enerji və ətraf mühit, enerji hüququ və iqtisadiyyatı, neft-qaz sənayesində idarəçilik və SOCAR-ın strateji perspektivləri kimi məsələlərlə geniş şəkildə tanış olacaqlar.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
