Asiya

Ana səhifə

Asiya

İraqda səfərdə olan Abdulla Gül Bərzani ilə görüşüb

24 mart 2009 11:01 (UTC +04:00)

Bağdad - APA. İraqda səfərdə olan Abdulla Gülün görüşləri davam edir. APA-nın beynəlxalq xəbər agentliklərinə istinadən verdiyi xəbərə görə, İraq səfərinin birinci günüdə prezident Cəlal Təlabani ilə görüşən Gül bu gün görüşlərinə iraqlı türkmən millət vəkillərini qəbul etməklə başlayıb.
Türkiyə prezidenti daha sonra İraqdakı kürd bölgə hökumətinin başçısı Neçirvan Bərzaninin başçılıq etdiyi nümayəndə heyətini qəbul edib.
Bir saatdan artıq davam edən və dünya mediasının böyük diqqət göstərdiyi görüşdə bölgə hökuməti ilə Türkiyə arasındakı əlaqələr, PKK probleminin həlli yolları müzakirə olunub.
Görüşdən sonra jurnalistlərə açıqlama verən Bərzani görüşü çox əhəmiyyətli adlandırıb: “Bu görüş tərəflər arasında əlaqələri gücləndirmək üçün çox böyük addımdır. Təbii ki, bizim baxışımızdan Türkiyə çox önəmli ölkədir. Biz Türkiyə ilə yaxşı əlaqələr qurmaq istəyirik. Eyni zamanda Türkiyənin narahatlığını da yaxşı anlayırıq”.
Bərzani deyib ki, İraq Konstitusiyasına görə, bölgə hökuməti İraq torpağından heç bir qonşu ölkəyə hücum edə və ya bu hücuma imkan verə bilməz: “Biz xüsusilə İraqın şimalından və İraqdan başqa qonşu ölkəyə hücum edilməsini qəbul etmirik”.
İraq prezidenti Cəlal Təlabaninin “PKK ya silahı buraxsın, ya da İraqı tərk etsin” açıqlamasına da münasibət bildirən Bərzani Təlabanini dəstəklədiklərini deyib: “Amma Türkiyə ilə əlaqələrimiz sadəcə bu problemdən ibarət deyil. Bizi birləşdirən, bir araya gətirən başqa məsələlər də var. Biz PKK probleminin sadəcə güc vasitəsilə həll ediləcəyinə inanmırıq, başqa alternativlər də olmalıdır”.
Bərzani terror təşkilatı PKK-nın əfv olunması ilə bağlı sualı da cavablandırıb: “Belə bir addımın atılması çox önəmli olar. Bu, problemin həllinə də yardım edər. Biz bunu dəstəkləyirik”.
Gülün İraqa səfəri bu gün başa çatır.
Qeyd edək ki, Abdulla Gül 30 illik fasilədən sonra İraqa rəsmi səfərə gedən ilk Türkiyə prezidentidir.