Asiya

Ana səhifə

Asiya

İranda sabiq prezidentliyə namizədə qarşı cinayət işi başlanıb

13 oktyabr 2009 13:48 (UTC +04:00)

Tehran-APA. İranda prezidentliyə sabiq namizəd və parlamentin keçmiş sədri Mehdi Kərrubiyə qarşı cinayət işi başlanıb. APA-nın “İRNA” agentliyinə istinadən yaydığı məlumata görə, cinayət işinin başlanmasına səbəb Mehdi Kərrubinin seçkilərdən sonra tərəfdarlarının həbsxanalarda işgəncələrə və zorlamalara məruz qaldığı barədə verdiyi bəyanatlardır. Tehran prokuroru Abbas Cəfəri Dolatabadi bildirib ki, Mehdi Kərrubi dini şəxs olduğuna görə onun işinə şəriət məhkəməsində baxılacaq. Dövlət ittihamçısı sabiq prezidentliyə namizədlə yanaşı daha bir neçə nəfər haqqında cinayət işinin başlandığını bildirib.

Xatırladaq ki, İranda seçkilərdən sonra həbs olunan müxalifət nümayəndələrinə işgəncə verilməsi faktı müxtəlif səviyyələrdə təsdiqini tapıb. Prezidentliyə sabiq namizəd Mehdi Kərrubi seçkilərin nəticələrinin saxtalaşdırılmasına etiraz etdiyinə görə həbs olunan müxalifət nümayəndələrinin həbsxanalarda seksual zorakılığa məruz qaldığına dair sübutları təqdim etməyə hazır olduğunu bildirib. O məmurlardan bu faktları araşdırmağı tələb edib. Kərrubi həmçinin həbsxanalarda bir neçə müxalifətçinin işgəncə verilərək öldürüldüyünə dair faktlara malik olduğunu da deyib. O həbsxanada seksual zorakılığa məruz qalan müxalifətçi bir kişi və qadının ifadələrini də açıqlayıb: “Gənc kişi və qadınların həbsxanada zorlamaya məruz qaldığı barədə çoxlu şahid ifadələri var. Əgər həbs olunanlara qarşı zorakılıq hallarına son qoyulmasa və hökumət bu faktları inkar etməkdə davam etsə, biz daha dəqiq məlumatları dərc edəcəyik. Bizim əlimizdə kifayət qədər belə faktlar var”.