Asiya

Ana səhifə

Asiya

İran parlamentinə 135 nəfərin deputat seçildiyi təsdiqlənib

03 mart 2012 16:07 (UTC +04:00)

APA-nın İran mətbuatına istinadən məlumatına görə, ölkənin daxili işlər naziri Mustafa Məhəmməd Nəccar bu gün İran xalqına seçkiyə qatıldığı üçün təşəkkür edib.

O bildirib ki, IX çağırış parlament seçkilərində İran əhalisinin 48 milyon 288 min 799 nəfəri səsvermə hüququna malik olub: “Onlardan 26 milyon 472 min 760 seçici seçkidə iştirak edib. Ölkədə mövcud olan 207 seçki məntəqəsindən 145 məntəqədə nəticələr məlumdur. Son nəticələrə görə, 290 yerlik parlamentə 135 nəfər deputat seçilib, 10 namizəd isə ikinci mərhələdə mübarizə aparmalı olacaq”.

Nazir qeyd edib ki, seçilən namizədlərin deputatlığı İran Keşikçilər Şurası tərəfindən təsdiqlənməlidir: “Seçkilərdə ən yüksək göstərici Kohkohuliyə Boyr Əhməd vilayətində qeydə alınıb. Orada seçicilərin 88%-i səsvermədə iştirak edib. Tehran şəhərində seçicilərin 48%-i, ətraf şəhərlərdə isə 56,73%-i seçkilərdə iştirak edib. Ümumilikdə Tehran vilayətində seçicilərin 52%-i səs verib. Beləliklə, əldə olan son məlumatlara görə, ölkədə seçicilərin 64.2%-i seçkilərdə iştirak edib”.